2017-ൽ അധികാരമേറ്റ നഗരസഭാ ഭരണസമിതിക്ക് ഈ വർഷം സെപ്റ്റംബർ 10 വരെയാണ് കാലാവധി. അതിനു മുമ്പായി തിരഞ്ഞെടുപ്പ് നടത്താനുള്ള ഒരുക്കങ്ങളാണ് സംസ്ഥാന തിരഞ്ഞെടുപ്പ് കമ്മിഷൻ നടത്തിവരുന്നത്.

തിരഞ്ഞെടുപ്പിന്റെ സമയക്രമത്തിൽ വന്ന വ്യത്യാസമാണ് മട്ടന്നൂർ നഗരസഭയെ ഒറ്റപ്പെടുത്തിയത്. 1991-ലാണ് മട്ടന്നൂരിനെ ആദ്യം നഗരസഭയായി ഉയർത്തിയത്. എന്നാൽ, അതേവർഷം ഭരണം മാറിവന്ന യു.ഡി.എഫ്. സർക്കാർ മട്ടന്നൂരിനെ വീണ്ടും പഞ്ചായത്താക്കി മാറ്റി. ഇതിനെതിരേ എൽ.ഡി.എഫ്. ഹൈക്കോടതിയെ സമീപിക്കുകയും 1992-ൽ മട്ടന്നൂരിന് നഗരസഭാ പദവി തിരിച്ചുനൽകാൻ വിധിക്കുകയും ചെയ്തു. എന്നാൽ, ജീവനക്കാരുടെ അഭാവവും മറ്റും മൂലം വർഷങ്ങളോളം നഗരസഭയെന്ന നിലയിലുള്ള പ്രവർത്തനം മട്ടന്നൂരിലുണ്ടായില്ല. സ്പെഷ്യൽ ഓഫീസറുടെ കീഴിലാണ് ഭരണം നടന്നത്.

1997-ലാണ് പിന്നീട് തിരഞ്ഞെടുപ്പ് നടക്കുകയും നഗരസഭാ ഭരണസമിതി അധികാരത്തിലെത്തുകയും ചെയ്തത്. അന്നുമുതൽ മറ്റു തദ്ദേശ സ്ഥാപനങ്ങളിലേക്കുള്ള തിരഞ്ഞെടുപ്പ് സമയത്തിൽനിന്ന് മാറിയാണ് മട്ടന്നൂർ നഗരസഭയിലേക്ക് തിരഞ്ഞെടുപ്പ്.

രൂപവത്‌കരിച്ചതു മുതൽ എൽ.ഡി.എഫാണ് മട്ടന്നൂർ നഗരസഭ ഭരിക്കുന്നത്. 2017-ലെ തിരഞ്ഞെടുപ്പിൽ 35 സീറ്റുകളിൽ 28-ഉം നേടിയാണ് അനിതാ വേണു അധ്യക്ഷയായ എൽ.ഡി.എഫ്. കൗൺസിൽ ഭരണത്തിലെത്തിയത്. ഏഴുസീറ്റ് മാത്രമാണ് യു.ഡി.എഫിന് നേടാനായത്. 2012-ൽ നടന്ന തിരഞ്ഞെടുപ്പിൽ 34 സീറ്റിൽ 20-ൽ എൽ.ഡി.എഫും 14-ൽ യു.ഡി.എഫും വിജയിച്ചിരുന്നു.

നഗരസഭാ തിരഞ്ഞെടുപ്പിന് മുന്നോടിയായി രാഷ്ട്രീയപാർട്ടി പ്രതിനിധികളുടെ യോഗം ചൊവ്വാഴ്ച തിരുവനന്തപുരത്ത് ചേരും. തിരഞ്ഞെടുപ്പിനായി രണ്ട്‌ വരണാധികാരികളെ കമ്മിഷൻ നിശ്ചയിച്ചിട്ടുണ്ട്. ഒന്നുമുതൽ 18 വരെ വാർഡുകൾക്ക് കണ്ണൂർ ഡിവിഷണൽ ഫോറസ്റ്റ് ഓഫീസറെയും 19 മുതൽ 35 വരെ വാർഡുകൾക്ക് കണ്ണൂർ സോഷ്യൽ ഫോറസ്ട്രി അസി. കൺസർവേറ്ററെയുമാണ് വരണാധികാരികളാക്കുന്നത്. സംവരണ വാർഡുകളുടെ നറുക്കെടുപ്പ്‌ ഒൻപതിന് കളക്ടറേറ്റിൽ നടക്കും.