കണ്ണവം : കൊട്ടിയൂർ വൈശാഖമഹോത്സവത്തിനെത്തുന്ന ഭക്തർക്ക് അന്നദാനവുമായി ചിറ്റാരിപ്പറമ്പിലെ സേവാഭാരതി പ്രവർത്തകർ. കണ്ണവം പതിനേഴാംമൈലിൽ ഒരുക്കിയ ഭക്ഷണശാലയിൽ ദിവസവും 1500-ലധികം ഭക്തരാണെത്തുന്നത്. മുൻവർഷങ്ങളിൽ തിരക്കുള്ള ദിവസങ്ങളിൽ കൊട്ടിയൂർ തീർഥാടകർക്ക് ഹോട്ടലിൽനിന്നുപോലും ഭക്ഷണം ലഭിച്ചിരുന്നില്ല. തുടർന്നാണ് സേവാഭാരതി ചിറ്റാരിപ്പറമ്പ് പഞ്ചായത്ത് കമ്മിറ്റി അന്നദാനത്തിനിറങ്ങിയത്. രാവിലെ എട്ട് മണി മുതൽ കഞ്ഞിയും പുഴുക്കും നൽകും. 11-ന് അന്നദാനം തുടങ്ങും. മിക്ക ദിവസങ്ങളിലും ഊണിനൊപ്പം പായസവുമുണ്ടാകും.

അന്നദാനത്തിന് ആവശ്യമായ അരി, പച്ചക്കറികൾ, ധാന്യങ്ങൾ, പാചകാവശ്യത്തിനുള്ള വിറക്‌ എന്നിവ സമീപപ്രദേശങ്ങളിലുള്ളവരാണ് എത്തിക്കുന്നത്. കഴിഞ്ഞ ഞായറാഴ്ച 5000-ത്തോളം പേർ ഭക്ഷണം കഴിക്കാനെത്തി. ഭക്തരെ അന്നദാനത്തിന് ക്ഷണിക്കാനായി റോഡിന്റെ ഇരുവശങ്ങളിലും സേവാഭാരതി പ്രവർത്തകരെയും സജ്ജമാക്കിയിട്ടുണ്ട്. ഭക്ഷണശാലയിൽ വളന്റിയർമാരായി കോളയാട്, കൂത്തുപറമ്പ്, പാട്യം പഞ്ചായത്തുകളിലെ സേവാഭാരതി യൂണിറ്റുകളിലെ പ്രവർത്തകരുമുണ്ട്‌. കെ. ശശിധരൻ ചെറുവാഞ്ചേരി, അനിരുദ്ധൻ കണ്ണവം, എം.ടി.രജീഷ് എന്നിവരാണ് പ്രവർത്തനത്തിന് നേതൃത്വം നൽകുന്നത്.