റോഡിന് നടുവിലും മാലിന്യം തള്ളുന്ന ഇടങ്ങളിലും ആളൊഴിഞ്ഞ ഇടങ്ങളിലും ഇടവഴികളിലുമെല്ലാം കൂട്ടമായാണ് ഇവ തമ്പടിക്കുന്നത്. ഇരുചക്രവാഹനങ്ങളെയും കാൽനടയാത്രക്കാരെയും നായശല്യം ഏറെ ബുദ്ധിമുട്ടിലാക്കുന്നുണ്ട്. അടുത്തെത്തിയാൽ മാത്രമേ രാത്രിയിൽ ഇവയെ കാണാൻ കഴിയൂ. അതുകൊണ്ടുതന്നെ അപകടസാധ്യതയും ഏറെയാണ്. പരസ്പരം കടിപിടികൂടുന്നതും യാത്രക്കാരെ ഭീതിയിലാഴ്‍ത്തുന്നു. തെരുവുനായകളുടെ ശല്യം ഒഴിവാക്കാൻ അടിയന്തര നടപടി വേണമെന്നാണ് യാത്രക്കാർ ആവശ്യപ്പെടുന്നത്.

ദേശീയ ആരോഗ്യ ദൗത്യം (എൻ.എച്ച്.എം.) റിപ്പോർട്ട് പ്രകാരം 2021 ഏപ്രിൽ മുതൽ 2022 മാർച്ച് വരെ ജില്ലയിൽ 17,920 പേരാണ് നായകടിയേറ്റ് പേവിഷ പ്രതിരോധ കുത്തിവെപ്പ് എടുത്തത്. നായശല്യം രൂക്ഷമാകുമ്പോളും ജില്ലാ പഞ്ചായത്ത് നടപ്പാക്കുന്ന തെരുവുനായ്ക്കളുടെ വന്ധ്യംകരണം പദ്ധതി (എ.ബി.സി.) മുടങ്ങിക്കിടക്കുകയാണ്.

വന്ധ്യംകരണകേന്ദ്രം പടിയൂരിലേക്ക് മാറ്റിയശേഷം മാത്രമേ പദ്ധതി ജില്ലയിൽ പുനരാരംഭിക്കൂവെന്ന് അധികൃതർ പറഞ്ഞു. എ.ബി.സി. പദ്ധതിയുടെ ഭാഗമായി 2021 ഓഗസ്റ്റ് മുതൽ 2022 ഫെബ്രുവരി വരെ 1,073 നായകളെ പിടികൂടി വന്ധ്യംകരിച്ചിരുന്നു.