തിരുവനന്തപുരം : കർഷക ഉൽപാദക സംഘങ്ങൾക്ക് (എഫ്‍.പി.ഒ) 60 ലക്ഷം രൂപ വരെ ഈടു‍രഹിത വായ്പയുമായി കേരള ബാങ്ക്. ചെറുകിട കർഷകർക്ക് ആധുനിക സാങ്കേതികവിദ്യയുടെ സഹായത്തോടെ കുറഞ്ഞ ചെലവിൽ ഉൽപാദനശേഷി വർധിപ്പിക്കുകയും മെച്ചപ്പെട്ട വിപണിസാധ്യതകൾ കണ്ടെത്തുക‍യുമാണ് ലക്ഷ്യം. പലിശ 9% . അർഹതപ്പെട്ട മേഖലയ്ക്ക് അഗ്രികൾചറൽ ഇൻഫ്രാസ്ട്രക്ചർ ഫണ്ടിൽനിന്ന് 3% പലിശ ഇള‍വിനും അർഹതയുണ്ട്. പരമാവധി 8 വർഷമാണ് തിരിച്ചടവ്‌ കാലാവധി. കാർഷിക ഉൽപന്നത്തിന്റെ സംസ്കരണം, വിപണനം, മ‍റ്റു മൂല്യവർധിത സംരംഭങ്ങൾ എന്നിവയ്ക്കാവശ്യമായ അടിസ്ഥാന സൗകര്യ‍വികസനത്തിനും വായ്പ ഉപയോഗിക്കാം.  

ഒരു കർഷകന് നേരിട്ട് നൽകുന്ന വായ്പയല്ല ഇത്. കർഷക ഉൽപാദക സംഘങ്ങൾക്ക് മാത്രമാണ് വായ്പ ലഭിക്കുക. എഫ്‍.പി.ഒ.യിൽ കുറഞ്ഞത് 500 കർഷകർ ഉണ്ടാകണം. 500 മുതൽ 4000 ഹെക്ടർ കൃഷിഭൂമി വേണം. രജിസ്ട്രേഷൻ തീയതി മുതൽ 6 മാസത്തെ സജീവ പ്രവർത്തനമുള്ള ലാഭത്തിൽ പ്രവർത്തിക്കുന്ന എഫ്‍.പി.ഒ.കളായിരിക്കണം.  ബാങ്ക് ക്രെഡിറ്റ് ‍ഗാരന്റി സ്കീമിൽ ഉൾപ്പെടുന്ന എഫ്‍.പി.ഒ.കൾക്ക് വസ്തു ജാമ്യം ആവശ്യമില്ല. കൂടുതൽ വിവരങ്ങൾക്ക് കേരള ബാങ്ക് ശാഖയുമായി ബന്ധപ്പെടണം.