തളിപ്പറമ്പ് : അഗ്നിരക്ഷാ സേനയിൽ ആധുനിക ജീവൻ രക്ഷാ ഉപകരണങ്ങളുമായി അഡ്വാൻസ് റസ്ക്യൂ ടെൻഡർ വാഹനം തളിപ്പറമ്പിലും എത്തി. തീ പിടുത്ത രംഗത്ത് അല്ലാതെ ജീവൻ രക്ഷിക്കാൻ ആവശ്യമായ 165 ഉപകരണങ്ങൾ വഹിക്കുന്ന വാഹനമാണ് തളിപ്പറമ്പിൽ അനുവദിച്ച അ‍ഡ്വാൻസ് റസ്ക്യൂ ടെൻഡറിൽ ഉള്ളത്.

വാതക ചോർച്ച ഉണ്ടായാൽ തിരിച്ചറിയാൻ സാധിക്കുന്ന ഗ്യാസ് ഡിറ്റക്ടർ, രാസവസ്തുക്കൾ ചോർന്നാൽ ഉപയോഗിക്കുന്ന കെമിക്കൽ സ്യൂട്ട്, മറിഞ്ഞ് കിടക്കുന്ന വാഹനങ്ങൾ എളുപ്പത്തിൽ ഉയർത്താൻ ഉപയോഗിക്കുന്ന എയർബാഗുകൾ, ലിഫ്റ്റുകളിൽ ആളുകൾ കുടുങ്ങിയാൽ തുറക്കാൻ സഹായിക്കുന്ന ലിഫ്റ്റ് കീ, കിണറുകളിലും കെട്ടിടങ്ങൾക്കുള്ളിലും കെട്ടി കിടക്കുന്ന പുകയും വിഷവാതകങ്ങളും പുറത്തേക്ക് അടിച്ച് കളയാനുള്ള ബ്ലോവർ,  കെട്ടിടങ്ങളിലും മറ്റ് ഉയർന്ന സ്ഥലങ്ങളിലും നിന്ന് ചാടുന്നവരെയും വീഴുന്നവരെയും രക്ഷിക്കാനുള്ള വല, കട്ടിയേറിയ ലോഹ പാളികളും മറ്റും മുറിക്കാനും അകറ്റാനും ഉള്ള ഹൈഡ്രോളിക് കട്ടർ, സ്പ്രെഡർ തുടങ്ങിയവ ഇതിലെ ചില ഉപകരണങ്ങളാണ്. വാഹനത്തിന്റെ ഫ്ലാഗ് ഓഫ് ഇന്ന് 4ന് തളിപ്പറമ്പ് അഗ്നിരക്ഷാ കേന്ദ്ര പരിസരത്ത് മന്ത്രി എം.വി.ഗോവിന്ദൻ നിർവഹിക്കും.