തിരുവനന്തപുരം : റീസർവേക്ക് ശേഷമുള്ള ഭൂമിയുടെ വിസ്തീർണത്തിൽ വ്യത്യാസം വരുമ്പോൾ കരമടക്കുന്നത് സംബന്ധിച്ച് റവന്യു വകുപ്പ് പുതിയ ഉത്തരവിറക്കി. വിസ്തീർണം കൂടിയാൽ, റീസർവേക്ക് മുൻപ് ആധാരപ്രകാരം പോക്കുവരവ് ചെയ്ത് കരമൊടുക്കി വന്നതിന്റെ അടിസ്ഥാനത്തിൽ തുടർന്നും കരമൊടുക്കാം.  

വിസ്തീർണം കുറഞ്ഞാൽ, കൈവശമുള്ള ഭൂമിക്കു കരമൊടുക്കാൻ സമ്മതമാണെന്ന് അറിയിച്ച് ബന്ധപ്പെട്ട കക്ഷി സത്യവാങ്മൂലം നൽകിയാൽ അപ്രകാരം കരമൊടുക്കി നൽകാമെന്നും അഡീഷനൽ ചീഫ് സെക്രട്ടറി ഈ മാസം 21ന് ഇറക്കിയ ഉത്തരവിൽ പറഞ്ഞു.

അധിക വിസ്തീർണം ക്രമവൽക്കരിക്കുന്നത് സംബന്ധിച്ച് നിയമനിർമാണം സർക്കാരിന്റെ പരിഗണനയിലാണ്. ഇക്കാര്യത്തിൽ ഉടൻ തീരുമാനമുണ്ടാകും എന്ന് റവന്യു മന്ത്രിയുടെ ഓഫിസ് അറിയിച്ചു. റീസർവേക്ക് ശേഷം റവന്യു രേഖകളിൽ വിസ്തീർണം കൂടുതൽ വരുന്ന കേസുകളിൽ 5% വരെ തഹസിൽദാർക്കും 5 ശതമാനത്തിന് മുകളിൽ ജില്ലാ കലക്ടർക്കും അധിക വിസ്തീർണം അനുവദിക്കാൻ 2020 സെപ്റ്റംബർ 15ന് ഇറക്കിയ ഉത്തരവ് റദ്ദാക്കി. 1964 ലെ സർവേ അതിരടയാള ചട്ടങ്ങൾ പ്രകാരം ഇറക്കിയതായിരുന്നു ഈ ഉത്തരവ്. വിസ്തീർണ വ്യത്യാസം സംബന്ധിച്ച് 1991 സെപ്റ്റംബർ 18നുള്ള റവന്യു ബോർഡ് (സർവേ) സെക്രട്ടറിയുടെ സർക്കുലറും റദ്ദാക്കിയിട്ടുണ്ട്.

റീസർവേക്ക് ശേഷം ഭൂമിയുടെ വിസ്തീർണത്തിൽ വ്യത്യാസം വരുന്നത് സ്വാഭാവികമാണ്. ഇത് കാരണം തുടർന്ന് കരമൊടുക്കാൻ കഴിയുന്നില്ലെന്ന ആയിരക്കണക്കിന് പരാതികൾ നിലനിൽക്കുന്നു. താലൂക്ക് ഓഫിസുകളിൽ കെട്ടിക്കിടക്കുന്ന റീസർവേ പരാതികളിൽ ഭൂരിഭാഗവും വിസ്തീർണ വ്യത്യാസം സംബന്ധിച്ചതാണ്.