മാനന്തവാടി: ഹോം സ്റ്റേ പെർമിറ്റിനായി തൊണ്ടർനാട് പഞ്ചായത്ത് ഓഫീസിൽ അപേക്ഷ നൽകിയയാളിൽനിന്ന് കൈക്കൂലി വാങ്ങുന്നതിനിടെ ഓവർസിയർ വിജിലൻസ് പിടിയിലായി. തൊണ്ടർനാട് പഞ്ചായത്തിലെ ഗ്രേഡ് (രണ്ട്) ഓവർസിയർ താമരശ്ശേരി സച്ചിദാനന്ദം വീട്ടിൽ പി. സുധിയെ (52) ആണ് വയനാട് വിജിലൻസ് സംഘം അറസ്റ്റ് ചെയ്തത്.

മാർച്ച് 25-നാണ് കെട്ടിട നിർമാണ കരാറുകാരനായ വ്യക്തി ഉടമകൾക്ക് വേണ്ടി പഞ്ചായത്തിൽ അപേക്ഷ നൽകിയത്. കണ്ണൂർ സ്വദേശികൾക്കായാണ് കോറോം മരച്ചുവട് മണിക്കല്ലിൽ ഹോം സ്റ്റേ നിർമിച്ചത്. കരാറുകാരൻ മുമ്പും ഹോം സ്റ്റേക്കായി പെർമിറ്റ് സമ്പാദിച്ചിരുന്നു. അന്ന് ഓവർസിയറായ സുധി പണം ആവശ്യപ്പെട്ടെങ്കിലും നൽകിയിരുന്നില്ല. പുതിയ പെർമിറ്റിനായി സമീപിച്ചപ്പോൾ പെർമിറ്റ് നൽകുന്നതിന് മുന്നോടിയായുള്ള സ്ഥലം സന്ദർശിക്കാതെ ഓവർസിയർ സുധി അപേക്ഷയിൽ കാലതാമസം വരുത്തി. അയ്യായിരം രൂപ കൈക്കൂലി ആവശ്യപ്പെട്ടതിനെ തുടർന്നാണ് കരാറുകാരനായ കെ.പി. ഷമീൽ വിജിലൻസിനെ സമീപിച്ചത്. 

ചൊവ്വാഴ്ച ഉച്ചയ്ക്ക് രണ്ടോടെ ഹോം സ്റ്റേ നിർമിക്കുന്ന സ്ഥലത്തുനിന്നാണ് വിജിലൻസ് നൽകിയ പണം ഷമീൽ സുധിക്ക് കൈമാറിയത്. സുധിയെ ബുധനാഴ്ച രാവിലെ തലശ്ശേരി വിജിലൻസ് കോടതിയിൽ ഹാജരാക്കും.