ബത്തേരി: കാട്ടിലിറങ്ങി കാട്ടാനയുടെ മുൻപിൽ അഭ്യാസം കാട്ടിയ യുവാക്കളെ കാട്ടാന ഓടിച്ചതിനു പുറമേ വനപാലകർ പിടികൂടി പിഴയുമിട്ടു. വയനാട് അതിർത്തിയിലെ കർണാടക ബന്ദിപ്പൂർ കടുവാ സങ്കേതത്തിൽ ദേശീയപാത 766ൽ മദൂരിനടുത്ത് കഴിഞ്ഞ ദിവസമാണ് സംഭവം. ഇതിന്റെ വിഡിയോ ദൃശ്യങ്ങൾ സമൂഹമാധ്യമങ്ങളിൽ പ്രചരിക്കുന്നുണ്ട്.

കോഴിക്കോട്ടു നിന്ന് മൈസൂരു ഭാഗത്തേക്ക് കാറിൽ പോവുകയായിരുന്നു യുവാക്കൾ. വഴിയരികിൽ കാട്ടാന നിൽക്കുന്നത് കണ്ടപ്പോൾ കാർ നിർത്തി 3 പേർ പുറത്തിറങ്ങി. കാറിനടുത്ത് നിന്ന് രണ്ടു പേർ ചിത്രങ്ങളും വിഡിയോയും പകർത്തിക്കൊണ്ടിരുന്നപ്പോൾ മൂന്നാമൻ കാട്ടിനുള്ളിലേക്ക് ഇറങ്ങി നടന്നു. പിന്നിലെ വാഹനത്തിൽ എത്തിയ യാത്രക്കാരിലൊരാൾ യുവാക്കളുടെ ചെയ്തികളെല്ലാം പകർത്തുന്നുണ്ടായിരുന്നു.

യുവാക്കൾ ദൃശ്യങ്ങളും സെൽഫിയുമൊക്കെ എടുക്കുന്നതിനിടെ കാട്ടാന കാറിനടുത്തേക്ക് കുതിച്ചെത്തി. പുറത്തിറങ്ങി നിന്നവർ കാറിനകത്തേക്കു കയറിയതോടെ, കാട്ടിലേക്ക് നടന്നയാളുടെ പിന്നാലെ കാട്ടാന ചിന്നം വിളിച്ച് ഇരമ്പിയെത്തി. റോഡിനു കുറുകെ ഓടിയെത്തിയ ആന മൂന്നാമനെ തട്ടിയെറിയുമെന്ന നിലയിലെത്തിയെങ്കിലും ആനയെ വെട്ടിച്ച് റോഡിലേക്കു വീണ്ടും ഓടാനായതിനാൽ തലനാരിഴയ്ക്ക് രക്ഷപ്പെട്ടു. കാറിനടുത്തേക്ക് യുവാവ് ഓടിയെത്തുന്നതിനിടെ ആനയും തൊട്ടുപിന്നാലെയെത്തി.
കാറിൽ കയറാൻ ശ്രമിക്കുന്നതിനിടെ ആന അടുത്തെത്തിയതോടെ കാർ മുന്നോട്ടെടുത്തു. നിലത്തു വീണു പോയ മൂന്നാമൻ ഒരു വിധത്തിൽ പിന്നീട് കാറിൽ കയറി രക്ഷപ്പെടുകയായിരുന്നു.

യുവാക്കൾ പിന്നീട് വാഹനമോടിച്ചെത്തിയത് കർണാടകയുടെ മദൂർ ചെക്പോസ്റ്റിലേക്കാണ്. അതിനകം സംഭവം അറിഞ്ഞിരുന്ന വനപാലകർ കാർ തടഞ്ഞു. വനത്തിൽ സ്ഥാപിച്ചിരുന്ന ക്യാമറകളിൽ ദൃശ്യങ്ങൾ പതിഞ്ഞിട്ടുണ്ടെന്നും പറയുന്നുണ്ട്. പട്രോളിങ്ങിലുണ്ടായിരുന്ന വനപാലകർ ഒരു തവണ യുവാക്കൾക്ക് മുന്നറിയിപ്പ് നൽകിയതുമാണത്രെ. നിരോധനമുള്ള സ്ഥലത്ത് വാഹനം നിർത്തി ഇറങ്ങിയതിനാണ് പിഴയിട്ടത്.‌