കേന്ദ്രസർക്കാരിന്റെ നിയന്ത്രണത്തിലുള്ള പ്രമുഖ ശാസ്ത്രഗവേഷണകേന്ദ്രമായ ‘ടാറ്റ ഇൻസ്റ്റിറ്റ്യൂട്ട് ഓഫ് ഫണ്ടമെന്റൽ റിസർച്’ (TIFR : www.tifr.res.in) മാത്തമാറ്റിക്സിലും ഫിസിക്സിലും ‘വിജ്ഞാൻ വിദുഷി’ പ്രോഗ്രാമിന് അപേക്ഷ ക്ഷണിച്ചു. വനിതകളെ ആഴത്തിലുള്ള അറിവുമായി പരിചയപ്പെടുത്തുക, ഗവേഷണത്തിന് പ്രോത്സാഹിപ്പിക്കുക എന്നീ ലക്ഷ്യങ്ങളോടെയാണു പദ്ധതി.

(എ) മാത്തമാറ്റിക്സ്

എം.എസ്‌.സി ഒന്നാം വർഷ ക്ലാസിലോ, ഇന്റഗ്രേറ്റഡ് ബി.എസ്‌.സി–എം.എസ്‌.സി.യുടെ നാലാം വർഷത്തിലോ പഠിക്കുന്ന പെൺകുട്ടികൾക്ക് അപേക്ഷിക്കാം. അതി‌സമർഥരായ മൂന്നാം വർഷ ബി.എസ്‌.സി / ബി.എസ്‌.സി–എം.എസ്‌.സി വിദ്യാർഥിനിക‌ളെയും പരിഗണിക്കും. 

ജൂലൈ 19–29 തീയതികളിലെ പ്രോഗ്രാമിന് മേയ് 13 വരെ ഓൺലൈനായി അപേക്ഷിക്കാം. യാത്രച്ചെലവ്, ക്യാംപസിൽ താമസസൗകര്യം, 3500 രൂപ സ്റ്റൈപൻഡ് എന്നിവ ലഭിക്കും. വെബ്സൈറ്റ് : www.math.tifr.res.in/vv.html, സംശയപരിഹാരത്തിന് vvmath @ math.tifr.res.in.

(ബി) ഫിസിക്സ്

ഫിസിക്സിലെ വിജ്ഞാൻ വിദുഷി പ്രോഗ്രാമിന്റെ ഘടനയും വ്യവസ്ഥകളും വ്യത്യസ്തമാണ്. ജൂലൈ 16–22 തീയതികളിൽ ഓൺലൈനായും ജൂലൈ 22 മുതൽ ഓഗസ്റ്റ് ഒന്നു വരെ ഓൺസൈറ്റായും പരിശീലനം നടത്തും. ടിഐഎഫ്ആറിന്റെ ഭാഗമായ ഹോമി ഭാഭ സെന്ററിലാണു പരിശീലനം. 

യാത്രച്ചെലവും സൗജന്യ താമസവും ഭക്ഷണവും ലഭിക്കും. മേയ് 5ന് അകം ഓൺലൈൻ അപേക്ഷ സമർപ്പിക്കണം. പെൺകുട്ടികൾ മാത്രം അപേക്ഷിച്ചാൽ മതി. കൂടുതൽ വിവരങ്ങൾക്കും അപേക്ഷാ സമർപ്പണത്തിനും വെബ്സൈറ്റ്: https://vv.hbcse.tifr.res.in