മലപ്പട്ടം : അനധികൃതമായി ഭൂമി കൈവശം വെക്കുന്നത് എത്ര ഉന്നതരായാലും നടപടി സ്വീകരിക്കുമെന്ന് റവന്യു-ഭവന നിര്‍മ്മാണ വകുപ്പ് മന്ത്രി കെ. രാജന്‍. മലപ്പട്ടം സ്മാര്‍ട്ട് വില്ലേജ് ഓഫീസ് കെട്ടിടോദ്ഘാടനം നിര്‍വ്വഹിക്കുകയായിരുന്നു മന്ത്രി.

ഭൂരഹിതരായ മുഴുവൻ പേർക്കും ഭൂമിയും വീടില്ലാത്ത മുഴുവൻ പേർക്കും വീടും നൽകുകയാണ് സർക്കാരിന്റെ പ്രധാന ലക്ഷ്യം. സർക്കാർ ഓഫീസുകളെ സ്മാർട്ടാക്കുന്ന പ്രവർത്തനം പുരോഗമിക്കുകയാണ്. തളിപ്പറമ്പിൽ റവന്യു ടവർ നിർമ്മാണം വൈകാതെ നടക്കുമെന്നും മന്ത്രി കെ. രാജൻ പറഞ്ഞു.

2018-19 വർഷത്തെ പ്ലാൻ സ്കീമിൽ ഉൾപ്പെടുത്തി 44 ലക്ഷം രൂപ ചിലവിലാണ് വില്ലേജ് ഓഫീസിനായി റവന്യു വകുപ്പ് ഇരുനില കെട്ടിടം നിർമ്മിച്ചത്. താഴത്തെ നിലയിൽ ഡോക്യുമെന്റ് സ്റ്റോർ, ഡൈനിംഗ് സ്‌റ്റെയർ റും എന്നിവയും ഒന്നാം നിലയിൽ ഓഫീസ്, വില്ലേജ് ഓഫീസറുടെ മുറി, കാത്തിരിക്കാനുള്ള ഇടം എന്നിവയുമാണ് ഒരുക്കിയിട്ടുള്ളത്. തദ്ദേശ സ്വയംഭരണ- എക്‌സൈസ് വകുപ്പ് മന്ത്രി എം.വി. ഗോവിന്ദന്‍ മാസ്റ്റര്‍ അധ്യക്ഷത വഹിച്ചു.

മലപ്പട്ടം പഞ്ചായത്തിൽ കഴിഞ്ഞ സാമ്പത്തിക വർഷം ലൈഫ് മിഷൻ ഭവന പദ്ധതി പ്രകാരം വീട് നിർമ്മാണം പൂർത്തിയാക്കിയവർക്കുള്ള താക്കോൽ ദാനവും പഞ്ചായത്തിലെ ഹരിത കർമ്മസേനാംഗങ്ങൾക്കുള്ള യുണിഫോം വിതരണവും മന്ത്രി ഗോവിന്ദൻ മാസ്റ്റർ നിർവഹിച്ചു. എക്‌സിക്യുട്ടീവ് എഞ്ചിനീയര്‍ കെ. ജിഷാകുമാരി റിപ്പോര്‍ട്ട് അവതരിപ്പിച്ചു.

ഇരിക്കൂര്‍ ബ്ലോക്ക് പഞ്ചായത്ത് പ്രസിഡണ്ട് അഡ്വ. റോബര്‍ട്ട് ജോര്‍ജ്, മലപ്പട്ടം പഞ്ചായത്ത് പ്രസിഡണ്ട് കെ.പി. രമണി, കളക്ടര്‍ എസ്. ചന്ദ്രശേഖർ, മലപ്പട്ടം പഞ്ചായത്ത് വൈസ് പ്രസിഡണ്ട് ഇ. ചന്ദ്രന്‍, വാര്‍ഡ് അംഗം ടി.കെ. സുജാത, എ.ഡി.എം.കെ കെ. ദിവാകരൻ, തളിപ്പറമ്പ് ആര്‍.ഡി.ഒ ഇ.പി. മേഴ്‌സി, രാഷ്ട്രീയ പാര്‍ട്ടി പ്രതിനിധികളായ മലപ്പട്ടം പ്രഭാകരന്‍ , പി.വി. ലക്ഷ്മണന്‍ (സി.പി.എം), പി.പി. നാരായണന്‍ (സി.പി.ഐ), എം.പി. രാധാകൃഷ്ണ്‍ (കോണ്‍ഗ്രസ്), കെ. സാജന്‍ (ജെ.ഡി.എസ്), കെ.പി. ഹസ്ബുള്ള തങ്ങള്‍ (മുസ്ലിം ലീഗ്), ടി.പി. പുരുഷോത്തമന്‍ (എല്‍.ജെ.ഡി) എന്നിവര്‍ പങ്കെടുത്തു.