ഇരിട്ടി : ശീതികരിച്ച ഹാളും വിനോദോപാധികളും ലൈബ്രറിയും ഉൾപ്പെടെ ആധുനിക സൗകര്യങ്ങളുമൊരുക്കി വയോജനങ്ങൾക്കായി മാട്ടറയിൽ പകൽവീട്‌ തുറന്നു. രണ്ട്‌ നിലകളിലായി നിർമിച്ച വിനോദ വിശ്രമ കേന്ദ്രത്തിലെ മുകൾനില ജനകീയ പങ്കാളിത്തത്തോടെയും സീനിയർ സിറ്റിസൺസ്‌ ഫോറം സഹകരണത്തോടെയും ശീതീകരിച്ചതാണ്‌. ജനകീയാസൂത്രണ രജത ജൂബിലി സ്‌മാരകമായാണ്‌ എ.സി. ഹാൾ നിർമിച്ചത്‌.
മാട്ടറ വാർഡിൽ നടപ്പാക്കുന്ന 25 ജനകീയ പദ്ധതിയിൽ ഉൾപ്പെടുത്തിയാണ്‌ പകൽവീടിന്റെ നവീകരണം. ജില്ലാ പഞ്ചായത്ത്‌ അനുവദിച്ച 15 ലക്ഷവും ഉളിക്കൽ പഞ്ചായത്തിന്റെ നാലുലക്ഷം രൂപയും ചേർത്താണ്‌ പകൽവീട്‌ നിർമിച്ചത്‌. ജനകീയ സഹായത്തോടെ പകൽവീട് വിപുലീകരിച്ച്‌ തുറന്നതോടെ 30 ലക്ഷം രൂപയുടെ മുതൽമുടക്കായെന്ന്‌ വാർഡംഗം സരുൺ തോമസ്‌ പറഞ്ഞു. ‘പ്രിയപ്പെട്ട രക്ഷിതാക്കൾക്ക്‌ സ്വന്തം ഗ്രന്ഥാലയം’ എന്ന പേരിൽ ലൈബ്രറിയും സജ്ജമാക്കി. മുറ്റത്ത്‌ ഉദ്യാനവുമുണ്ട്‌.

ഒന്നാംനിലയിൽ കാരംബോർഡും ടെലിവിഷനും ഒരുക്കി. പകൽവീട്‌ പദ്ധതി ഭാഗമായി ഇവിടെ വയോജനങ്ങൾക്കായി ഹെൽത്ത്‌ ക്ലബ്ബും തുറന്നിരുന്നു. ക്ലബ്‌ നടത്തിപ്പിനായി വർഷംതോറും ഒരു മാസത്തെ പെൻഷൻ നൽകുമെന്ന്‌ അധ്യാപികയായി വിരമിച്ച ഡെയ്‌സി മുണ്ട്യാനിയിൽ വാഗ്‌ദാനം ചെയ്‌തിട്ടുണ്ട്‌.
ജില്ലാ പഞ്ചായത്ത്‌ പ്രസിഡന്റ്‌ പി.പി. ദിവ്യ പകൽവീട് ഉദ്ഘാടനം ചെയ്തു. പഞ്ചായത്ത്‌ പ്രസിഡന്റ്‌ പി.സി. ഷാജി അധ്യക്ഷനായി. ജനകീയാസൂത്രണ രജത ജൂബിലി ഹാൾ ജില്ലാ പഞ്ചായത്ത്‌ അംഗം ലിസി ജോസഫ് ഉദ്ഘാടനം ചെയ്തു. ലൈബ്രറി പഞ്ചായത്ത്‌ വൈസ് പ്രസിഡന്റ്‌ ആയിഷ ഇബ്രാഹിം ഉദ്ഘാടനം ചെയ്‌തു. ഒ.വി. ഷാജു, തോമസ് വർഗീസ്, സിജി മംഗലത്ത്കരോട്ട്, സീനിയർ സിറ്റിസൺ ഫോറം സംസ്ഥാന ജനറൽ സെക്രട്ടറി പി. കുമാരൻ, ഇരിട്ടി ബ്ലോക്ക് പ്രസിഡന്റ്‌ എ.എൻ. സുകുമാരൻ, ചാക്കോ ഇളംതുരുത്തിപ്പടവിൽ, സെബാസ്റ്റ്യൻ, സരുൺ തോമസ്, മാത്യു പുളിക്കാട്ട്  തുടങ്ങിയവർ സംസാരിച്ചു.