ഇരിട്ടി : വൈവിധ്യവത്കരണത്തിലൂടെ വരുമാന വർധന ലക്ഷ്യമാക്കി ആറളം ഫാമിൽ നടപ്പാക്കുന്ന ഒന്നാംഘട്ട വികസനപദ്ധതികളുടെ ഭാഗമായി ആടുവളർത്തൽ യൂണിറ്റും ബ്രീഡിങ്ങ് യൂണിറ്റും തുടങ്ങി.

മലബാറി, ജമ്‌നപ്യാരി, ബീറ്റൽ എന്നീ ഇനങ്ങളിലുള്ള ആടുകളെയാണ് ബ്രീഡിങ്ങിനായെത്തിച്ചത്. ഫാം കേന്ദ്രസർക്കാരിന്റെ നിയന്ത്രണത്തിലായിരുന്നപ്പോൾ നല്ലനിലയിൽ പ്രവർത്തിച്ചുവന്ന എട്ടാം ബ്ലോക്കിലാണ് ബ്രീഡിങ് യൂണിറ്റ് പ്രവർത്തനം തുടങ്ങിയത്.

ജമ്‌നാപ്യാരിക്ക് 500 രൂപയും മറ്റ് ഇനങ്ങൾക്ക് 450 രൂപയുമാണ് ബ്രീഡിങ്ങിന്‌ ഈടാക്കുക. വൈവിധ്യവത്കരണത്തിന്റെ ഭാഗമായി 22.4 ലക്ഷം രൂപ മുടക്കി ഫാമിൽ ആട്, പശുവളർത്തൽ യൂണിറ്റുകൾ നേരത്തേ തുടങ്ങിയിരുന്നു. 25 ആടുകൾ വീതമുള്ള രണ്ട് യൂണിറ്റും 10 പശുക്കളുടെ ഒരുയൂണിറ്റുമാണ് ആദ്യഘട്ടത്തിൽ തുടങ്ങിയത്. താറാവ് യൂണിറ്റ് തുടങ്ങാനുള്ള പ്രവർത്തനങ്ങളും ആരംഭിച്ചു. എട്ടാം ബ്ലോക്കിൽ ഒരേക്കർ സ്ഥലം ആന കയറാതിരിക്കാൻ കമ്പിവേലി കെട്ടി സംരക്ഷിച്ചിട്ടുണ്ട്. കാർഷിക സർവകാലാശാലാ ഗവേഷണവിഭാഗം ഫാം പുരുദ്ധാരണത്തിനായി സമർപ്പിച്ച 22 കോടി രൂപയുടെ പദ്ധതികളിൽ നാലുകോടിയോളം രൂപയുടെ പ്രവൃത്തികൾക്കാണ് ഇപ്പോൾ അനുമതി കിട്ടിയിരിക്കുന്നത്.

നാളികേരവികസനപദ്ധതി പ്രകാരം രണ്ട് ലക്ഷത്തോളം തെങ്ങിൻതൈകൾ കൃഷിവകുപ്പ് മുഖാന്തരം ജനങ്ങൾക്ക് നൽകാനുള്ള പ്രവർത്തനങ്ങളും പുരോഗമിക്കുകയാണ്. ഫാം സെൻട്രർ നഴ്‌സറിയുടെ നവീകരണവും പൂർത്തിയായിവരികയാണ്. ഫാം എം.ഡി. ബിമൽ ഘോഷിന്റെ നേതൃത്വത്തിൽ മറ്റ് പദ്ധതികൾക്കുള്ള പണം വകയിരുത്തുന്നതിനുള്ള പ്രവർത്തനങ്ങളും തുടങ്ങി.

കാർഷികവിളകളെല്ലാം കാട്ടനക്കൂട്ടങ്ങൾ വ്യാപകമായി നശിപ്പിക്കുകയാണ്. തേങ്ങ ഉത്പാദനം മൂന്നിലൊന്നായി കുറഞ്ഞു. കുരങ്ങ് ശല്യത്തിനൊപ്പം കാട്ടാനകൾ തെങ്ങിന്റെ ചുവട് ചവിട്ടിവീഴ്ത്തുന്നതും വ്യാപകമാണ്. കശുമാവുകളും കവുങ്ങും വ്യാപകമായി നശിപ്പിക്കുന്നണ്ട്. ഇത്തരം വിളകളുടെ ആവർത്തനകൃഷി പ്രോത്സാഹിപ്പിക്കാൻ പറ്റാത്ത സഹചര്യമാണ്. വന്യമൃഗങ്ങൾ നശിപ്പിക്കാത്ത ഇഞ്ചിയും മഞ്ഞളും പ്രോത്സാഹിപ്പിക്കുന്നതോടൊപ്പം ആട്, പശുവളർത്തൽ എന്നിവയിലൂടെയും വരുമാനം വർധിപ്പിക്കാനുള്ള പ്രവർത്തനങ്ങളുമാണ് പുരോഗമിക്കുന്നത്.