പേരാവൂർ: വയറെരിയുന്നവരുടെ മിഴി നനയാതിരിക്കാൻ ഡി.വൈ.എഫ്.ഐ പേരാവൂർ ബ്ലോക്ക് കമ്മിറ്റി പേരാവൂർ താലൂക്കാസ്പത്രിയിൽ നടത്തിവരുന്ന പൊതിച്ചോർ വിതരണം അഞ്ചാം വർഷത്തിലേക്ക്. 2018 മാർച്ച് 31-നാണ് പേരാവൂർ താലൂക്കാസ്പത്രിയിൽ നടന്ന ഒരു ചടങ്ങിൽ പൊതിച്ചോർ വിതരണ പദ്ധതി അന്നത്തെ എം.പിയായിരുന്ന ശ്രീമതി ടീച്ചർ പ്രഖ്യാപിച്ചത്. പിറ്റേന്ന് ( 2018 ഏപ്രിൽ ഒന്ന് ) ഉച്ചക്ക് ആസ്പത്രി പരിസരത്ത് നടന്ന ചടങ്ങിൽ സി.പി.എം ഏരിയാ സെക്രട്ടറി അഡ്വ.എം.രാജൻ പദ്ധതി ഉദ്ഘാടനം ചെയ്തു. ഡി.വൈ.എഫ്.ഐ ബ്ലോക്ക് സെക്രട്ടറി കെ.കെ. ശ്രീജിത്തിൻ്റെയും പ്രസിഡൻ്റ് കെ.സംതീഷ് കുമാറിൻ്റെയും നേതൃത്വത്തിലാരംഭിച്ച പദ്ധതിയാണ് ഏപ്രിൽ ഒന്നിന് നാലു വർഷം പൂർത്തിയാക്കുന്നത്.

4 വർഷം കൊണ്ട് ഒരു ലക്ഷത്തിലധികം പൊതിച്ചോറുകളാണ് ഡി.വൈ.എഫ്.ഐ പ്രവർത്തകർ പേരാവൂർ താലൂക്കാസ്പത്രിയിലെ രോഗികൾക്കും കൂട്ടിരിപ്പുകാർക്കുമായി വിതരണം ചെയ്തത്. ബ്ലോക്ക് കമ്മിറ്റിക്ക് കീഴിലെ 186 യൂണിറ്റുകളാണ് ഒരു ദിവസം പോലും മുടക്കം വരുത്താതെ ഈ സദുദ്യമത്തിൽ പങ്കു ചേർന്നത്. ദിവസവും 70 നും 100 നുമിടയിൽ പൊതിച്ചോറുകൾ ആസ്പത്രിയിൽ വിതരണം ചെയ്യുന്നുണ്ട്.

കണ്ണൂർ ജില്ലയിൽ ജില്ലാ ജനറലാസ്പത്രിയിലും തലശ്ശേരി ജനറലാസ്പത്രിയിലും ഡി.വൈ.എഫ്.ഐ ജില്ലാ കമ്മിറ്റിയുടെ നേതൃത്വത്തിൽ പൊതിച്ചോർ വിതരണം നടക്കുന്നുണ്ട്. ജില്ലയിൽ 18 ബ്ലോക്ക് കമ്മറ്റികൾ ഡി.വൈ.എഫ്.ഐക്കുണ്ടെങ്കിലും പേരാവൂർ ബ്ലോക്ക് കമ്മറ്റി മാത്രമാണ് ഇത്തരമൊരു പദ്ധതി നടപ്പിലാക്കിയത്. പദ്ധതിയുടെ അഞ്ചാം വർഷത്തിലേക്കുള്ള പ്രയാണം വെളളിയാഴ്ച ഉച്ചക്ക് 1 മണിക്ക് ജില്ലാ പഞ്ചായത്ത് ഉപാധ്യക്ഷൻ ബിനോയ് കുര്യൻ നിർവഹിക്കും.