തിരുവനന്തപുരം : വിജ്ഞാപനം ചെയ്യപ്പെടാത്ത വിഭാഗത്തിലെ ഭൂമി, പരിശോധനയിൽ നെൽവയലോ തണ്ണീർത്തടമോ ആണെന്ന് കണ്ടെത്തി ഭൂമി തരംമാറ്റത്തിനുള്ള അപേക്ഷ ആർ.ഡി.ഒ നിരസിച്ചാൽ അതിനെ ഡേറ്റാ ബാങ്കിൽ ഉൾപ്പെടുത്തും. ഇക്കാര്യം പരിഗണിക്കാൻ പ്രാദേശിക നിരീക്ഷണ സമിതിക്ക്‌ (എൽ.എൽ.എം.സി) ആർ.ഡി.ഒ.മാർ ശുപാർശ നൽകണമെന്ന് റവന്യു വകുപ്പിന്റെ സ്റ്റാൻഡേഡ് ഓപ്പറേറ്റിങ് പ്രൊസീജ്യറിൽ (എസ്.ഒ.പി) വ്യക്തമാക്കി.

അപേക്ഷകൾ റവന്യു ഡിവിഷനൽ ഓഫിസുകളിൽ മുൻഗണനാക്രമത്തിൽ തീർപ്പാക്കണമെന്നും ഇവ കൈകാര്യം ചെയ്യുന്ന ആർ.ഡി.ഒ, താലൂക്ക്, വില്ലേജ് ഓഫിസുകളിൽ നിയമത്തിലോ ചട്ടങ്ങളിലോ നിഷ്കർഷിച്ചിട്ടില്ലാത്ത അനാവശ്യമായ നടപടിക്രമങ്ങൾ ഒഴിവാക്കണമെന്നും നിർദേശമുണ്ട്. ഇ-ഓഫിസ് നിലവിലുള്ള ഓഫിസിലും അപേക്ഷയുടെ വിവരങ്ങൾ രജിസ്റ്ററുകളിൽ എഴുതി സൂക്ഷിക്കണം. 

ആർ.ഡി.ഒ / സബ്‌ കലക്ടർ തരം മാറ്റത്തിന് ഉത്തരവിട്ട കേസുകളിൽ ഭൂരേഖകളിൽ മാറ്റംവരുത്തുന്നതിനായി (സബ്‌ ഡിവിഷൻ നടപടി) വീണ്ടും അപേക്ഷിക്കേണ്ട. ഉത്തരവിന് അനുസൃതമായി ഭൂരേഖാ തഹസിൽദാർ നടപടി സ്വീകരിക്കണം. എല്ലാ അപേക്ഷകളും റവന്യു വകുപ്പിന്റെ  www.revenue.kerala.gov.in  എന്ന വെബ്സൈറ്റ് വഴിയാണ് സ്വീകരിക്കുന്നത്. ആർഡിഒയ്ക്കു ലഭിക്കുന്ന രേഖകൾ അടക്കമുള്ള അപേക്ഷ വില്ലേജ്, കൃഷി ഓഫിസർമാർക്ക് അയച്ച് റിപ്പോർട്ട് ലഭ്യമാക്കിയ ശേഷം ഉത്തരവ് നൽകും. 

ഓൺലൈനായി അപേക്ഷിക്കാൻ 1000 രൂപ ഫീസുണ്ട്. അനുകൂല ഉത്തരവു ലഭിച്ചാൽ ഭൂമിയുടെ നിശ്ചിത നിരക്കിലുള്ള ഫീസ് അടയ്ക്കണം. തുടർന്ന് ആർ.ഡി.ഒ തഹസിൽദാർക്ക് കൈമാറുന്ന ഉത്തരവിൽ നടപടി സ്വീകരിച്ച് വില്ലേജ് ഓഫിസർക്ക് ലഭിക്കുമ്പോൾ ഭൂരേഖകളിൽ മാറ്റം വരുത്തും. 25 സെന്റ് വരെയുള്ള ഭൂമി തരം മാറ്റാൻ ഫീസ് ഇല്ല. 1967 ജൂലൈ 4നു മുൻപ് തരംമാറ്റിയത് സംബന്ധിച്ച രേഖകൾ ഹാജരാക്കിയാലും സൗജന്യ തരംമാറ്റം അനുവദിക്കും.