നേരത്തെ പലതവണ വാഹനങ്ങൾ മറിഞ്ഞ് അപകടങ്ങൾ ഉണ്ടായിട്ടുണ്ട്‌. ശ്രീകണ്ഠപുരത്തുനിന്ന് ചെമ്പേരി, കുടിയാൻമല, പൈതൽമല, പയ്യാവൂർ, ചന്ദനക്കാംപാറ, കുന്നത്തൂർപ്പാടി, കാഞ്ഞിരക്കൊല്ലി, ഉളിക്കൽ ഭാഗങ്ങളിലേക്കെല്ലാം ബസുകളടക്കം നിരവധി വാഹനങ്ങൾ ഇതുവഴിയാണ് കടന്നുപോകുന്നത്. അതിവേഗത്തിൽ പോകുന്ന വാഹനങ്ങൾക്ക് ഇവിടെയുള്ള അപകടക്കെണി പെട്ടെന്ന് കാണാനാകില്ല.

പൈതൽമല, കാഞ്ഞിരക്കൊല്ലി തുടങ്ങിയ വിനോദസഞ്ചാരകേന്ദ്രങ്ങളിലേക്കും കുന്നത്തൂർപ്പാടി മുത്തപ്പദേവസ്ഥാനത്തേക്കും ജില്ലക്ക് പുറത്തുനിന്നടക്കം ആളുകൾ വാഹനങ്ങളിൽ എത്തുന്നത് ഇതുവഴിയാണ്.

എന്നാൽ ഓടത്തുപാലം ഭാഗത്തെ അപകടഭീഷണി പലരും അറിയുന്നില്ല. രാത്രിയിൽ ഇവിടെ വെളിച്ചമില്ലാത്തതും അപകടസാധ്യത വർധിപ്പിക്കുന്നു. ഇരുവശങ്ങളിലും വീതികൂട്ടി നടപ്പാതയും ഭിത്തിയും വെളിച്ചവും ഒരുക്കണമെന്നാവശ്യപ്പെട്ട് വിവിധ സംഘടനകൾ അധികൃതർക്ക് നിവേദനം നൽകിയിട്ടുണ്ട്.