കണ്ണൂർ : കണ്ണൂർ പൊലീസ്‌ മൈതാനിയിൽ ആധുനിക ടർഫ്‌ ഗ്രൗണ്ട്‌ ഉദ്‌ഘാടനത്തിനൊരുങ്ങി. നഗരമധ്യത്തിൽ ഒരുകോടിയോളം രൂപ ചെലവഴിച്ചാണ്‌ പൊലീസ്‌ ഹൗസിങ് കൺസ്‌ട്രക്ഷൻ കോർപറേഷൻ ജില്ലയിലെ ഏറ്റവും വലിയ ടർഫ്‌ ഗ്രൗണ്ട്‌ സജ്ജീകരിച്ചത്‌. അടുത്തയാഴ്‌ച മുഖ്യമന്ത്രി പിണറായി വിജയൻ ഉദ്‌ഘാടനംചെയ്യും. 

അഖിലേന്ത്യാ സെവൻസ്‌ ഫുട്‌ബോൾ ടൂർണമെന്റടക്കം നടത്താനുള്ള സൗകര്യങ്ങളോടെയാണ്‌ ടർഫ്‌ ഒരുക്കിയത്‌. 60 മീറ്റർ നീളവും 44 മീറ്റർ വീതിയുമുള്ള ടർഫിൽ ഒരേസമയം സെവൻസും ഫൈവ്‌സും കളിക്കാനാകും. ഗ്രൗണ്ടിലെ നിലത്തുവിരിക്കാനുള്ള ടർഫ്‌ തായ്‌വാനിൽനിന്നാണ്‌ ഇറക്കുമതി ചെയ്‌തത്‌. സംസ്ഥാനത്ത്‌ പൊലീസ്‌ നേതൃത്വത്തിൽ സജ്ജമാകുന്ന ആദ്യ ടർഫാണിത്‌. 

ടർഫ്‌ ഗ്രൗണ്ടിന്റെ ഒരു ഭാഗത്ത്‌ അമ്പത്‌ മീറ്റർ പവിലിയനും ഒരുക്കിയിട്ടുണ്ട്‌. ആധുനിക രീതിയിലുള്ള വെളിച്ച സംവിധാനങ്ങളും ഗ്രൗണ്ടിന്‌ പകിട്ടേകും. ടർഫിന്റെ സമീപത്തെ മതിലിൽ കേരളം കണ്ട മികച്ച ഫുട്‌ബോളറായ വി.പി. സത്യന്റേതടക്കം 25 കായിക താരങ്ങളുടെ ചിത്രങ്ങളും വരക്കുന്നുണ്ട്‌. 

പൊലീസ്‌ മൈതാനം സൗന്ദര്യവൽക്കരണവും ഇതോടൊപ്പം നടക്കുന്നുണ്ട്‌. 1.68 കോടി രൂപ ചെലവിലാണിത്‌. പ്രഭാത നടത്തത്തിനായി 500 മീറ്റർ ട്രാക്കും ഒരുക്കുന്നുണ്ട്‌. പൊലീസ്‌ പരേഡ്‌ ഗ്രൗണ്ടിനെ വേർതിരിക്കുന്ന ഭാഗത്ത്‌ ഇരിപ്പിടത്തിന്റെ മാതൃകയിലാണ്‌ മതിൽ നിർമിച്ചത്‌. പൊലീസ്‌ ഗ്രൗണ്ടിൽ അത്‌ലറ്റിക്‌ ട്രാക്കടക്കം മൂന്ന്‌ കോടി രൂപയുടെ വികസന പ്രവർത്തനങ്ങൾക്ക്‌ സ്‌പോർട്‌സ്‌ കൗൺസിലും അനുമതി നൽകിയിട്ടുണ്ട്‌.