കണ്ണൂർ: എക്സ്പ്രസ് സ്‌പെഷ്യൽ തീവണ്ടികളിൽ റിസർവാക്കി ഓടിച്ച ജനറൽ കോച്ചിൽ ആളില്ല. വരുമാനനഷ്ടം കാരണം 14 തീവണ്ടികളിൽ ഏപ്രിൽ ഒന്നുമുതൽ ഇവ അൺ റിസർവ്ഡ് കോച്ചുകളാക്കും. കേരളത്തിലെ അഞ്ച്‌ ജോഡി വണ്ടികൾ ഉൾപ്പെടെ 10 വണ്ടികളിലാണ് സിറ്റിങ് ജനറൽ കോച്ചുകൾ റെയിൽവേ പുനഃസ്ഥാപിക്കുന്നത്.

മംഗളൂരു-കൊച്ചുവേളി അന്ത്യോദയ (16355/16356), മംഗളൂരു-കോഴിക്കോട് എക്സ്പ്രസ് (16610), കണ്ണൂർ-കോയമ്പത്തൂർ (16607/16608), നിലമ്പൂർ-കോട്ടയം എക്സ്പ്രസ് (16325/16326), ഗുരുവായൂർ-പുനലൂർ (16327/16328), തിരുച്ചിറപ്പള്ളി-പാലക്കാട് ടൗൺ (16843/16844), നാഗർകോവിൽ-കോട്ടയം (16366), ചെന്നൈ-ജോലാർപേട്ട യെലഗിരി എക്സ്പ്രസ് (16089/16090) എന്നിവയാണ് വണ്ടികൾ. ഇവയിൽ സാധാരണ ടിക്കറ്റും സീസൺടിക്കറ്റും അനുവദിക്കും. ആഴ്ചയിൽ രണ്ടുദിവസമുള്ള അന്ത്യോദയയ്ക്ക് മുഴുവൻ കോച്ചുകളും ജനറലാണ്. രാത്രി ഓടുന്ന ഈ വണ്ടിയിൽ മംഗളൂരു-കൊച്ചുവേളി യാത്രക്കാർക്ക് റിസർവ് ചെയ്യാതെ യാത്ര ചെയ്യാം.

ഹാൾട്ട് സ്റ്റേഷനിൽ അവ്യക്തത

56654 എന്ന പഴയ മംഗളൂരു-കോഴിക്കോട് പാസഞ്ചർ ഇപ്പോൾ എക്സ്പ്രസായിട്ടാണ് (16610) ഓടിക്കുന്നത്. ഇതിൽ സാധാരണ ടിക്കറ്റോ സീസണോ അനുവദിച്ചിട്ടില്ല. മാർച്ച് 28 മുതൽ 31 വരെയുള്ള ഓൺലൈൻ റിസർവേഷൻ നിലയനുസരിച്ച് 794 മുതൽ 820 വരെ സീറ്റുകളാണ് ഇതിൽ ഒഴിവുള്ളത്. റിസർവ് ചെയ്ത് പോകുന്നവർ നൂറിൽ താഴെയാണ്. നഷ്ടത്തിൽ ഓടിയിട്ടും ഇതിൽ അൺ റിസർവ്ഡ് കോച്ചുകൾ അനുവദിച്ചിരുന്നില്ല. ഏപ്രിൽ ഒന്നുമുതൽ വണ്ടിയിലെ മുഴുവൻ കോച്ചുകളും ജനറൽ ആകും. എന്നാൽ വണ്ടി ഹാൾട്ട് സ്റ്റേഷനിൽ നിർത്തുമോ എന്ന് റെയിൽവേ വ്യക്തമാക്കിയിട്ടില്ല. മംഗളൂരുമുതൽ കോഴിക്കോടുവരെ 10 ഹാൾട്ട് സ്റ്റേഷനുകളാണുള്ളത്. വെള്ളയിൽ, ചേമഞ്ചേരി, വെള്ളറക്കാട്, ഇരിങ്ങൽ, നാദാപുരം റോഡ്, മുക്കാളി, ധർമടം, ചിറക്കൽ, ചന്തേര, കളനാട് ഹാൾട്ട് സ്റ്റേഷനുകളിൽ നിലവിൽ ഒരു വണ്ടിയും നിർത്തുന്നില്ല.