ന്യൂഡൽഹി: ക്രിമിനൽ കേസുകളിൽ പ്രതിയാക്കപ്പെട്ടവരുടെയും കുറ്റവാളികളുടെയും ശാരീരിക-ജൈവ സാംപിളുകൾ ശേഖരിക്കാൻ പോലീസിന് അധികാരം നൽകുന്ന നിയമവുമായി കേന്ദ്രസർക്കാർ. ഇതിനായുള്ള ക്രിമിനൽ നടപടി (തിരിച്ചറിയൽ) ബിൽ ലോക്‌സഭയിൽ അവതരിപ്പിച്ചു. പ്രതിപക്ഷത്തിന്റെ രൂക്ഷവിമർശനത്തെത്തുടർന്ന് അവതരണാനുമതിക്ക് വോട്ടെടുപ്പ്‌ വേണ്ടിവന്നു. പ്രതിപക്ഷത്തിന്റെ 58 വോട്ടിനെ 120 വോട്ടുമായി ഭരണപക്ഷം മറികടന്നു. ആഭ്യന്തര സഹമന്ത്രി അജയ്‌മിശ്ര ടെനിയാണ് ബിൽ അവതരിപ്പിച്ചത്.

ബില്ലിലെ വ്യവസ്ഥപ്രകാരം ഒരു സ്റ്റേഷനിലെ ഹെഡ് കോൺസ്റ്റബിളിന് ക്രിമിനൽ കേസുകളിൽ കുറ്റവാളികളുടെയും കുറ്റാരോപിതരുടെയും ശാരീരിക-ജൈവ തെളിവുകൾ ശേഖരിക്കാം. ജയിലിലാണെങ്കിൽ വാർഡന് തെളിവെടുക്കാൻ അധികാരമുണ്ടാവും. തെളിവുശേഖരണത്തിൽ ആധുനികവിദ്യകൾ ഉപയോഗിക്കാൻ അവസരമൊരുക്കാനാണ് ബില്ലെന്ന് മന്ത്രി വിശദീകരിച്ചു. 1920 മുതലുള്ള ഇപ്പോഴത്തെ നിയമംവഴി വിരലടയാളം, കാലടയാളം തുടങ്ങിയവ മാത്രമേ ശേഖരിക്കാനാവൂ. നിയമാനുസൃതമായ അളവുകൾക്കുള്ള സാധ്യത വികസിപ്പിക്കാനും അതുവഴി അന്വേഷണ ഏജൻസികൾക്ക് കേസുകളിൽ വേഗത്തിൽ തീർപ്പാക്കാനുംവേണ്ടിയാണ് ഈ നിയമം. ‘‘ലോകത്താകെ സാങ്കേതികവും ശാസ്ത്രീയവുമായ മാറ്റങ്ങൾ വന്നിരിക്കുന്നു. കുറ്റകൃത്യങ്ങളുടെ രീതികൾതന്നെ മാറുന്നു’’ -മന്ത്രി വാദിച്ചു.

ബിൽ ഭരണഘടനാവിരുദ്ധവും വ്യക്തിസ്വാതന്ത്ര്യത്തിൽ കടന്നുകയറലുമാണെന്ന് പ്രതിപക്ഷം കുറ്റപ്പെടുത്തി. നാർകോ, മസ്തിഷ്ക പരിശോധനകളിലേക്കു നയിക്കാനിടയുള്ള ജൈവസാംപിൾ ശേഖരണം സുപ്രീംകോടതി ഉത്തരവിന്റെ ലംഘനമാണെന്ന് കോൺഗ്രസ് നേതാവ് മനീഷ് തിവാരി പറഞ്ഞു. വ്യക്തിസ്വാതന്ത്ര്യത്തെയും മനുഷ്യാവകാശത്തെയും ലംഘിക്കുന്നതാണ് നിയമമെന്ന് എൻ.കെ. പ്രേമചന്ദ്രൻ വിമർശിച്ചു. സ്വകാര്യതയ്ക്കുള്ള അവകാശം മൗലികാവകാശമായി സുപ്രീംകോടതി പ്രഖ്യാപിച്ചിട്ടുള്ള സാഹചര്യത്തിൽ നിയമം പാസാക്കാൻ പാർലമെന്റിന് അധികാരമില്ല. മൗലികാവകാശങ്ങൾക്കുമേലുള്ള ഭരണകൂട കടന്നുകയറ്റത്തിന് വഴിമരുന്നിടുന്നതാണ് ബില്ലെന്ന് കൊടിക്കുന്നിൽ സുരേഷ് കുറ്റപ്പെടുത്തി. കോൺഗ്രസ് ലോക്‌സഭാ കക്ഷിനേതാവ് അധീർ രഞ്ജൻ ചൗധരി, ബി.എസ്.പി.യിലെ ഋതേഷ് പാണ്ഡെ തുടങ്ങിയവരും ബില്ലിനെ എതിർത്തുസംസാരിച്ചു.