ആലത്തൂർ: എൺപത്തിയാറ് വർഷം മുമ്പ് രണ്ടാംക്ലാസിന്റെ പടിയിറങ്ങിപ്പോയ മാധവിയമ്മ പുതിയങ്കം ഗവ. യു.പി. സ്‌കൂളിലേക്ക് വീണ്ടുമെത്തി. ജീവിത പരീക്ഷകൾ ഒരുപാട് നേരിട്ടെങ്കിലും തനിക്ക് ഒരങ്കത്തിനുകൂടി ബാല്യമുണ്ടെന്ന് തെളിയിക്കാനായിരുന്നു ഈ 95-കാരിയുടെ ശ്രമം. സാക്ഷരതാ മിഷന്റെ പഠ്‌നാ ലിഖ്‌നാ അഭിയാൻ പ്രാഥമിക പരീക്ഷയെഴുതാനാണ് സ്കൂളിലേക്കുള്ള മാധവിയമ്മയുടെ രണ്ടാംവരവ്.

ഡ്രൈവറായിരുന്ന പുതിയങ്കം പേഴുമ്പറമ്പിൽ പരേതനായ കരുണാകരനാണ് മാധവി അമ്മയുടെ ഭർത്താവ്. ജീവിത പ്രാരബ്ധങ്ങളിൽ കുരുങ്ങി രണ്ടാംക്ലാസിൽ പഠിപ്പ് നിർത്തി. ചെറുപ്പത്തിലേ തന്നെ വിവാഹം. 45 വർഷം മുമ്പ് ഭർത്താവ് മരിച്ചു. പിന്നീട് നാല് മക്കളെ വളർത്താനുള്ള പെടാപ്പാട്. ഇതിനുവേണ്ടി കർഷകത്തൊഴിലാളിയായി. എഴുതാനും വായിക്കാനും അറിയില്ലെങ്കിലും രണ്ടാംക്ലാസിൽ കൈവിട്ടുപോയ അക്ഷരങ്ങളോടുള്ള പ്രണയം മനസ്സിൽ അണയാതെ സൂക്ഷിച്ചു. ജനകീയ സാക്ഷരതാ പ്രസ്ഥാനം തുടങ്ങിയ കാലത്ത് പഠിക്കാൻ ശ്രമിച്ചെങ്കിലും സാഹചര്യം ഒത്തുവന്നില്ല.

പഠ്‌നാ ലിഖ്‌നാ പദ്ധതി ആരംഭിച്ചപ്പോൾ സാക്ഷരതാ പ്രേരക് അംബുജം മാധവി അമ്മയെ ക്ലാസിലേക്ക് ക്ഷണിച്ചു. അങ്ങനെ അക്ഷരങ്ങളുമായുള്ള ചങ്ങാത്തം വീണ്ടും ആരംഭിച്ചു. പഠ്‌നാ ലിഖ്‌നാ പദ്ധതിയുടെ പ്രാഥമികതല പരീക്ഷയാണ് ഞായറാഴ്ച എഴുതിയത്. ജില്ലയിൽ പരീക്ഷ എഴുതിയ അരലക്ഷത്തോളം പഠിതാക്കളിൽ ഏറ്റവും പ്രായംകൂടിയയാളായിരുന്നു അവർ. പുതിയങ്കം സ്‌കൂളിൽ മാധവിയമ്മക്കൊപ്പം പരീക്ഷ എഴുതിയ 24-കാരിയായ സൂര്യയായിരുന്നു ഈ കേന്ദ്രത്തിലെ ഏറ്റവും പ്രായംകുറഞ്ഞ പഠിതാവ്. ഒരേ ബെഞ്ചിലിരുന്ന് അവർ പരീക്ഷ എഴുതിയതും കൗതുകമായി. പഴനിയിൽ ജനിച്ചുവളർന്ന സൂര്യ വിവാഹിതയായാണ് ആലത്തൂരിലെത്തിയത്. ശരിക്കും നാട്ടുകാരിയായി മാറാനാണ് മലയാളം പഠിച്ചുതുടങ്ങിയത്. ആലത്തൂർ നെല്ലിയാങ്കുന്നം കേന്ദ്രത്തിൽ 94-കാരി മാങ്ങോടിയും പരീക്ഷ എഴുതാനെത്തിയിരുന്നു.