ഇരിട്ടി : മലയോര മേഖലയിലെ 454 കയർപിരി തൊഴിലാളികൾക്ക് തടഞ്ഞുവെച്ച ആനുകൂല്യങ്ങൾ ഉടൻ നൽകാൻ ഹൈക്കോടതി ഉത്തരവ്. ഇൻകം സപ്പോർട്ട് പദ്ധതി പ്രകാരമുള്ള ആനുകൂല്യമാണ്‌ തടഞ്ഞുവെച്ചത്‌.

ഇരിട്ടി കുന്നോത്ത് കേന്ദ്രമായി പ്രവർത്തിക്കുന്ന മലബാർ ഗോൾഡൺ ഫൈബേഴ്‌സ്, മലബാർ നാച്വറൽ ഫൈബേഴ്‌സ്, മലബാർ കോക്കനട്ട് ഫൈബേഴ്‌സ് എന്നീ സ്ഥാപനങ്ങളിൽ രജിസ്റ്റർ ചെയ്ത തൊഴിലാളികൾ അവരുടെ വീടുകളിൽനിന്നും എടുത്ത തൊഴിലിനുള്ള ആനുകൂല്യം മൂന്നുമാസത്തിനുള്ളിൽ നല്കണമെന്ന് ഹൈക്കോടതി ജഡ്ജി ജസ്റ്റിസ്‌ മുരളി പുരുഷോത്തമൻ ഉത്തരവിട്ടു.

തൊഴിലാളികൾക്ക് നല്കാനുള്ള ഏഴുമാസത്തെ ആനുകൂല്യം തടഞ്ഞുവെച്ച ജില്ലാ കയർ പ്രോജക്ട് ഓഫീസറുടെ നടപടിക്കെതിരേ ജില്ല സ്വതന്ത്ര കയർത്തൊഴിലാളി യൂണിയനുവേണ്ടി പ്രസിഡന്റ്‌ ലിസി പുറവന്തുരുത്തിയാണ് കോടതിയെ സമീപിച്ചത്. കയർത്തൊഴിലാളി ക്ഷേമനിധി അംഗത്വം, തൊഴിലുടമയുടെ വിഹിതം ബാങ്ക് മുഖേന ലഭിച്ചതിന്റെ രേഖകൾ എന്നിവ പരിശോധിച്ചായിരിക്കും ആനുകൂല്യങ്ങൾ നൽകുക. തൊഴിലാളികൾ ഓരോരുത്തരും വ്യക്തിപരമായി അവരവരുടെ അർഹത തെളിയിക്കുന്ന രേഖകൾ സഹിതം പുതിയ അപേക്ഷകൾ നൽകണം.

അമ്പായത്തോട്, പുന്നാട്, കപ്പച്ചേരി, പെരുവമ്പറമ്പ്, മുക്കട്ടി, പെരുവമ്പറമ്പ്, കല്ലുവയൽ, പരിക്കളം, ആയിരക്കളം, പായം, കോളിക്കടവ്, മലപ്പൊട്ട്, പേരട്ട, സാലസ്പുരം, വാഴയിൽ, നാട്ടേൽ, മൂന്നാംകുറ്റി, മരംവീണകണ്ടി, ചെടിക്കളം, ശാന്തിനഗർ എന്നീ 20 സ്ഥലങ്ങൾ കേന്ദ്രീകരിച്ച് കയർപിരി തൊഴിൽ ചെയ്തവർക്കാണ് ആനുകൂല്യം ലഭിക്കുക. കയർ ബോർഡ് മുഖാന്തരം പരിശീലനം നേടിയ വീടുകളിൽനിന്ന് കയർപിരിച്ച് രജിസ്റ്റർ ചെയ്ത സ്ഥാപനങ്ങളിൽ വില്പന നടത്തിയ തൊഴിലാളികളുടെ ആനുകൂല്യമാണ് തടഞ്ഞുവെച്ചത്.

ഇൻകം സപ്പോർട്ട് സ്‌കീം പ്രകാരം ഒരുകിലോഗ്രാം കയർ പിരിക്കുന്ന ഒരു തൊഴിലാളിക്ക് 15 രൂപ തൊഴിലുടമയും 20 രൂപ സർക്കാരും തൊഴിലാളികളുടെ ബാങ്ക് അക്കൗണ്ട് മുഖേന നൽകണം. ഉത്പാദിപ്പിക്കുന്ന കയർ സർക്കാർ ഉടമസ്ഥതയിലുള്ള കയർഫെഡിന്‌ നൽകണം.

അവർക്ക്‌ കയർ ആവശ്യമില്ലെങ്കിൽ മാത്രമേ പുറത്ത്‌ വിൽക്കാൻ അനുമതിയുള്ളൂ. ഇതാണ് ഇൻകം സപ്പോർട്ട് പദ്ധതി. എന്നാൽ വീടുകളിൽനിന്ന്‌ തൊഴിലെടുക്കുന്നവരെ തൊഴിലാളികളായി അംഗീകരിക്കാൻ അധികൃതർ തയ്യാറായില്ല.

പ്രശ്‌നം തൊഴിലാളികൾ അന്നത്തെ മുഖ്യമന്ത്രി ഉമ്മൻ ചാണ്ടിക്ക് പരാതി നൽകി. പ്രശ്‌നം പരിശോധിക്കാൻ കയർ ഡയറക്ടറേറ്റിലെ ഡെപ്യൂട്ടി ഡയറക്ടറെ അന്വേഷണത്തിന് നിയോഗിച്ചു. കമ്മിഷൻ തൊഴിലാളികളെ നേരിട്ട് സമീപിച്ച് കയറിന്റെ ഗുണമേന്മ പരിശോധിക്കുകയും തൊഴിലാളികൾക്ക് അനുകൂലമായി റിപ്പോർട്ട് നൽകുകയും ചെയ്തു.

10 ദിവസത്തിനുള്ളിൽ തൊഴിലാളികൾക്ക് പൂർണ ആനുകൂല്യങ്ങൾ നൽകാൻ ഉത്തരവായെങ്കിലും കയർ ഡയറക്ടറുടെ ഉത്തരവ് ജില്ലയിൽ നടപ്പിലാക്കാത്തതിനെതിരേയാണ് തൊഴിലാളികൾ കോടതിയെ സമീപിച്ചത്.