കണിച്ചാർ: പാർശ്വവല്കരിക്കപ്പെട്ടവർ, കുട്ടികൾ, കൗമാരക്കാർ, യുവജനങ്ങൾ, വയോജനങ്ങൾ, ഭിന്നശേഷിക്കാർ, പട്ടികജാതി-പട്ടികവർഗ വിഭാഗങ്ങൾ തുടങ്ങിയവരുടെയെല്ലാം ഉന്നമനം ലക്ഷ്യമിട്ട ബജറ്റ് വൈസ്.പ്രസിഡൻറ് ഷാൻറി തോമസ് അവതരിപ്പിച്ചു. 22 കോടി 59 ലക്ഷം രൂപ വരവും 22 കോടി 47 ലക്ഷം രൂപ ചിലവും 12 ലക്ഷം രൂപ മിച്ചവും പ്രതീക്ഷിക്കുന്നതാണ് ബജറ്റ്.

ഉൽപാദന മേഖലയിൽ തേനൂറും കണിച്ചാർ പദ്ധതിയിൽ തേനീച്ച വളർത്തലിന് 10 ലക്ഷം, മുഴുവൻ വീടുകളിലും അടുക്കളത്തോട്ടം വ്യാപിപ്പിച്ച് പച്ചക്കറിയിൽ സ്വയം പര്യാപ്തതക്കും, വാഴക്കൃഷി, നെൽകൃഷി, തെങ്ങ് കൃഷി എന്നിവക്കുമായി കാർഷിക മേഖലയിൽ 55 ലക്ഷം, മൃഗസംരക്ഷണ മേഖലയിൽ പാൽ, മുട്ട ഉൽപാദനത്തിൽ സ്വയം പര്യാപ്തതക്കും ക്ഷീരകർഷകർക്ക് തൊഴുത്ത് നിർമിക്കാനും ഒരു കോടി ആറ് ലക്ഷം രൂപയും ബജറ്റിലുണ്ട്.

പൊതു റോഡുകളിൽ തെരുവ് വിളക്കുകൾ സ്ഥാപിക്കാൻ 50 ലക്ഷം, സ്ത്രീകൾക്ക് സ്വയം പ്രതിരോധ പരിശീലനത്തിന് 25 ലക്ഷം, സ്ത്രീകളുടെ വരുമാന വർധനവിന് കുടുംബശ്രീ വിപുലീകരണം എന്നിവയും ബജറ്റിൽ ഉൾപ്പെട്ടിട്ടുണ്ട്.

നീരുറവകൾ സംരക്ഷിക്കുന്നതിന് ഹരിത കേരളമിഷനുമായി ചേർന്ന് വിവിധ പദ്ധതികൾക്ക് 10 ലക്ഷം, ബഡ്സ് സ്കൂൾ നിർമ്മിക്കുന്നതിന് 20 ലക്ഷം,ആരോഗ്യ മേഖലയിൽ പൂളക്കുറ്റി സബ്‌സെൻ്റർ സേവനം മെച്ചപ്പെടുത്താനും, രോഗ നിർണയ ക്യാമ്പുകൾക്കും ജീവിത ശൈലീ രോഗ നിയന്ത്രണത്തിനുമായി 67 ലക്ഷം രൂപയുമാണ് വകയിരുത്തിയിട്ടുള്ളത്. 

വിദ്യാഭ്യാസ മേഖലയിൽ ഓടപ്പുഴ ജി.എൽ.പി സ്കൂൾ അടിസ്ഥാന സൗകര്യ വികസനത്തിന് 19 ലക്ഷം, അതി ദരിദ്രരെ സംരക്ഷിക്കാൻ 20 ലക്ഷം,പട്ടിക ജാതി -പട്ടിക വർഗ കുടുംബങ്ങൾക്ക് ഭൂമി, വീട്, വിദ്യാഭ്യാസം, തൊഴിൽ എന്നിവ ലഭ്യമാക്കാൻ 53 ലക്ഷം രൂപയും ബജറ്റിൽ നീക്കിവെച്ചിട്ടുണ്ട്.

മാലിന്യ സംസ്കരണ പദ്ധതികൾക്ക് 40 ലക്ഷം രൂപയും ലൈഫ് ഭവന നിർമ്മാണത്തിനായി 51 ലക്ഷവും ബജറ്റിൽ വകയിരുത്തിയിട്ടുണ്ട്.

പഞ്ചായത്ത് പ്രസിഡൻറ് ആൻറണി സെബാസ്റ്റ്യൻ, സെക്രട്ടറി എൻ. പ്രദീപൻ, സ്റ്റാൻഡിംഗ് കമ്മറ്റി അംഗങ്ങൾ, മറ്റ് പഞ്ചായത്ത് അംഗങ്ങൾ, നിർവഹണ ഉദ്യോഗസ്ഥർ എന്നിവർ ബജറ്റ് സമ്മേളനത്തിൽ പങ്കെടുത്തു.