മാന്നാർ : പെയിന്റിങ് തൊഴിലാളിയായ അച്ഛൻ രോഗിയായപ്പോൾ, ആ ജോലി ഏറ്റെടുത്ത് മൂന്നു പെൺമക്കൾ. പെയിന്റിങ് ജോലികൾ ചെയ്തിരുന്ന മാന്നാർ കുട്ടംപേരൂർ മുട്ടേൽ കരിയിൽ വീട്ടിൽ മണിക്കുട്ടന് (48) നാലുമാസം മുൻപാണ് മസ്തിഷ്കാഘാതം ഉണ്ടായത്. പഴയതു പോലെ ജോലികൾ ചെയ്യാൻ കഴിയാതായി. ഭാര്യ രാജി (44) മാവേലിക്കര കല്ലുമലയിലെ ഒരു സൂപ്പർമാർക്കറ്റിൽ ജോലി ചെയ്ത് കിട്ടുന്ന തുച്ഛമായ വരുമാനം മണിക്കുട്ടന്റെ ചികിത്സയ്ക്കും കുട്ടികളുടെ പഠനത്തിനും വീട്ടുചെലവുകൾക്കും തികയാതായി.

ഈ സാഹചര്യത്തിലാണ് മണിക്കുട്ടൻ നേരത്തേ ഏറ്റെടുത്ത ജോലികൾ പൂർത്തിയാക്കാൻ 3 പെൺമക്കൾ പെയിന്റും ബ്രഷും കയ്യിലെടുത്തത്. മൂത്തമകൾ നവമി ബെംഗളൂരുവിൽ ഒന്നാം വർഷ ബി.എസ്‌.സി നഴ്സിങ് വിദ്യാർഥിയാണ്. രണ്ടാമത്തെയാൾ ചെങ്ങന്നൂർ ഗവ.എച്ച്.എസ്. എസ്സിലെ പ്ലസ് വൺ വിദ്യാർഥിനി പൗർണമി. ഇളയമകൾ അഷ്ടമി, കുട്ടംപേരൂർ കുന്നത്തൂർ യു.പി.എസ്സിൽ 7–ാം ക്ലാസ് വിദ്യാർഥിയാണ്.

അച്ഛൻ ഏറ്റെടുത്ത ചുമരെഴുത്ത് ജോലികൾ തീർക്കുകയാണ് മൂവരുടെയും ലക്ഷ്യം. കൈക്ക് സ്വാധീനക്കുറവ് ഉണ്ടായിട്ടും മണിക്കുട്ടൻ എഴുത്തുവാചകത്തിന്റെയും ചിത്രങ്ങളുടെയും പുറംരേഖ (ഔട്‌ലൈൻ) ഇട്ടുകൊടുക്കും. മക്കൾ അതു വർണങ്ങൾ കൊടുത്ത് ഭംഗിയാക്കും. നവമി ഇപ്പോൾ സ്ഥലത്തില്ലാത്തതിനാൽ പൗർണമിയാണ് മെയിൻ ആർട്ടിസ്റ്റ്. സഹായിയായി അഷ്ടമിയും കൂടും. പക്ഷേ, ഇവർക്ക് എന്നും ജോലിക്ക് പോകാൻ കഴിയില്ല; സ്കൂളുണ്ടല്ലോ. അവധിദിവസങ്ങളിലാണ് ജോലി ചെയ്തുതീർക്കുന്നത്.

വളരെ പഴക്കമുള്ള വീടാണ് ഇവരുടേത്. പ്രളയത്തിൽ വീടിന് കേടുപാടുണ്ടായി. ഭിത്തികളും കട്ടിളയുമെല്ലാം നശിച്ചു. അടച്ചുറപ്പുള്ള വീട് വേണം, മക്കളുടെ പഠനം പൂർത്തിയാക്കണം. ഇതിനൊക്കെ എങ്ങനെ പണം കണ്ടെത്തുമെന്നറിയാതെ വിഷമിക്കുകയാണ് മണിക്കുട്ടൻ. സുമനസ്സുകൾ സഹായിക്കുമെന്നാണ് പ്രതീക്ഷ. ഫോൺ: 98469 71965.