തിരുവനന്തപുരം : ക്ഷയരോഗനിവാരണ പ്രവർത്തനങ്ങളിൽ കേരളം കൈവരിച്ച നേട്ടങ്ങൾക്ക് കേന്ദ്ര സർക്കാരിന്റെ പുരസ്‌കാരം.  ആരോഗ്യമന്ത്രാലയത്തിന്റെ ക്ഷയരോഗമുക്ത നിലവാരം വിലയിരുത്തുന്ന സിൽവർ വിഭാഗത്തിലാണ്‌ കേരളത്തിന്‌ പുരസ്‌കാരം. സബ് നാഷണൽ സർട്ടിഫിക്കേഷന്റെ ഭാഗമായാണ്‌ പുരസ്‌കാരം ഏർപ്പെടുത്തിയത്‌.

2015നെ അപേക്ഷിച്ച് 2021ൽ 40 ശതമാനത്തിലധികം ക്ഷയരോഗനിരക്ക് കുറഞ്ഞതിനാണ് 50 ലക്ഷം രൂപയും പ്രശസ്തി പത്രവും അടങ്ങിയ പുരസ്‌കാരം.  സിൽവർ കാറ്റഗറിയിൽ പുരസ്‌കാരം നേടുന്ന ഏക സംസ്ഥാനമാണ് കേരളം.  ലോക ക്ഷയരോഗ ദിനത്തോടനുബന്ധിച്ച്‌ ഡൽഹിയിൽ പുരസ്‌കാരം വിതരണംചെയ്യും.

ക്ഷയരോഗനിവാരണ പ്രവർത്തനങ്ങൾക്ക് ജില്ലകൾക്കും പുരസ്‌കാരങ്ങളുണ്ട്‌. മലപ്പുറം, വയനാട് ജില്ലകൾക്ക് ഗോൾഡ് വിഭാഗത്തിലും തിരുവനന്തപുരം, കൊല്ലം, ആലപ്പുഴ, പത്തനംതിട്ട, കോട്ടയം, ഇടുക്കി, തൃശൂർ, പാലക്കാട്, മലപ്പുറം, വയനാട്, കാസർകോട്‌ ജില്ലകൾക്ക് സിൽവർ വിഭാഗത്തിലും എറണാകുളം, കണ്ണൂർ ജില്ലകൾക്ക് വെങ്കല വിഭാഗത്തിലും പുരസ്‌കാരം നേടി.

മികച്ച പ്രവർത്തനങ്ങൾക്കുള്ള 
അംഗീകാരം: മന്ത്രി

ക്ഷയരോഗനിവാരണ പ്രവർത്തനങ്ങൾക്ക് സംസ്ഥാനം നടത്തിയ മികച്ച പ്രവർത്തനങ്ങൾക്കുള്ള അംഗീകാരമാണ് ഈ ബഹുമതിയെന്ന് ആരോഗ്യമന്ത്രി വീണാ ജോർജ് പറഞ്ഞു. കോവിഡ് സാഹചര്യത്തിലും ക്ഷയരോഗികളെ കണ്ടെത്താൻ അക്ഷയ കേരളം പദ്ധതി ഊർജിതമായി നടപ്പാക്കി. 2025ഓടെ ക്ഷയരോഗമുക്തിയാണ്‌ സംസ്ഥാനം ലക്ഷ്യമിടുന്നതെന്നും മന്ത്രി വ്യക്തമാക്കി.