കോളയാട് : ദരിദ്ര ജനവിഭാഗത്തെ സംരക്ഷിക്കുന്നതിനും പഞ്ചായത്തിന്റെ സമഗ്ര മേഖലകളിൽ വികസനം ലക്ഷ്യമിട്ടുമുള്ള ബജറ്റ് വൈസ്.പ്രസിഡന്റ് കെ.ഇ. സുധീഷ് കുമാർ അവതരിപ്പിച്ചു. പശ്ചാത്തല വികസനം, വിദ്യാഭ്യാസം, ശുചിത്വ പരിപാലനം എന്നിവക്ക് ഊന്നൽ നല്കിയുള്ള ബജറ്റ്28 കോടി 63 ലക്ഷം രൂപ വരവും 26 കോടി 56 ലക്ഷം രൂപ ചിലവും ഒരു കോടി ആറ് ലക്ഷം രൂപ മിച്ചവും പ്രതീക്ഷിക്കുന്നു. 

പട്ടികജാതി-പട്ടികവർഗ കോളനികളുടെ വികസനത്തിന് 97 ലക്ഷം,  പാർപ്പിട നിർമാണത്തിന് ആറു കോടി, സ്ത്രീകളുടെ ഉന്നമനത്തിന് അഞ്ച് ലക്ഷം, കുടുംബശ്രീക്ക് ചെറുകിട സൂക്ഷ്മ സംരംഭങ്ങൾ തുടങ്ങാൻ 32 ലക്ഷം, പഞ്ചായത്ത് ശ്മശാന നിർമാണം പൂർത്തീകരിക്കാൻ 70 ലക്ഷം, എടയാറിൽ വഴിയോര വിശ്രമ ശുചിമുറിക്ക് 35 ലക്ഷം, ആരോഗ്യവകുപ്പിന്റെ പ്രവർത്തനങ്ങൾക്ക് 25 ലക്ഷം എന്നിവ ബജറ്റിലുണ്ട്.

സ്‌കൂൾ നവീകരണത്തിന് 15 ലക്ഷം,പഞ്ചായത്ത് കെട്ടിടം ആധുനിക-സൗന്ദര്യവല്കരണത്തിനും ആഴ്ച ചന്തക്ക് കെട്ടിടം നിർമിക്കാനും ഒന്നരക്കോടി, ബഡ്‌സ് സ്‌കൂളിന്റെ അടിസ്ഥാന സൗകര്യ വികസനത്തിന് 16 ലക്ഷം, വയോജനങ്ങൾക്ക് പകൽ വീട് നിർമിക്കാൻ 10 ലക്ഷം, അങ്കണവാടികൾക്ക് അടിസ്ഥാന വികസനത്തിന് 15 ലക്ഷം, കോളയാട് മിനി സ്റ്റേഡിയം നവീകരണത്തിന് 32 ലക്ഷം എന്നിവക്ക് തുക വകയിരുത്തിയിട്ടുണ്ട്.

മാതാപിതാക്കളില്ലാത്ത കുട്ടികളുടെ സംരക്ഷണത്തിന് രണ്ട് ലക്ഷം, അതിദരിദ്രരുടെ ഉപജീവന സുരക്ഷയും സാമൂഹ്യ സുരക്ഷയും ഉറപ്പ് വരുത്താൻ 10 ലക്ഷം, വയോജനങ്ങൾക്കും നിരാലംഭർക്കും വാതിൽപ്പടി സേവനം ലഭ്യമാക്കാൻ ഒരു ലക്ഷം, തെരുവ് വിളക്കുകൾ സ്ഥാപിക്കാൻ 20 ലക്ഷം, തൊഴിലുറപ്പ് പദ്ധതിക്ക് ഏഴ് കോടി, കുടിവെള്ള പദ്ധതിക്ക് 25 ലക്ഷവും ബജറ്റിലുണ്ട്. 

പഞ്ചായത്ത് പ്രസിഡന്റ് എം. റിജി അധ്യഷത വഹിച്ചു. ടി. ജയരാജൻ, ശ്രീജ പ്രദീപൻ, റോയ് പൗലോസ്, കെ.പി. സുരേഷ്‌കുമാർ, ടി. ശങ്കരൻ, സാജൻ ചെറിയാൻ തുടങ്ങിയവർ സംസാരിച്ചു.