കോവിഡ് ബാധിതരായ കുട്ടികളില്‍ ഉണ്ടാകുന്ന പ്രകൃതിദത്ത ആന്റിബോഡികള്‍ കുറഞ്ഞത് ഏഴ് മാസം വരെ ശരീരത്തില്‍ നിലനില്‍ക്കുമെന്ന് ഹൂസ്റ്റണിലെ യൂണിവേഴ്‌സിറ്റി ഓഫ് ടെക്‌സസ് ഹെല്‍ത്ത് സയന്‍സ് സെന്റര്‍ നടത്തിയ പഠനത്തില്‍ കണ്ടെത്തി. അഞ്ച് മുതല്‍ 19 വയസ്സ് വരെയുള്ള 218 കുട്ടികളിലാണ് ഗവേഷണം നടത്തിയത്. പഠനത്തില്‍ പങ്കെടുത്ത വോളന്റിയര്‍മാരായ കുട്ടികളില്‍ നിന്ന് മൂന്ന് തവണ രക്തമെടുത്ത് പരിശോധിച്ചു. 

രോഗലക്ഷണങ്ങളോട് കൂടിയല്ലാതെ കോവിഡ് വന്നവര്‍ക്കും തീവ്രമായ ലക്ഷണങ്ങള്‍ വന്നവര്‍ക്കുമെല്ലാം ഇതില്‍ വ്യത്യാസമില്ലെന്ന് ഗവേഷണ റിപ്പോര്‍ട്ട് പറയുന്നു. കുട്ടികളുടെ ഭാരം, അമിതവണ്ണം, ആണ്‍പെണ്‍ വ്യത്യാസം എന്നിവയൊന്നും ഇതില്‍ ബാധകമല്ല. 14 ദശലക്ഷം കുട്ടികള്‍ക്കാണ് അമേരിക്കയില്‍ കോവിഡ് നിര്‍ണയിക്കപ്പെട്ടതെന്ന് ഗവേഷണത്തിന് നേതൃത്വം നല്‍കിയ എപ്പിഡെമോളജി പ്രഫ. സാറ മെസായ പറഞ്ഞു. 

കോവിഡ് ബാധയെ തുടര്‍ന്നുണ്ടാകുന്ന പ്രതിരോധശേഷിയും വാക്‌സീന്‍ മൂലമുണ്ടാകുന്ന സംരക്ഷണവും ചേരുന്ന ഹൈബ്രിഡ് പ്രതിരോധമാണ് കോവിഡിനെതിരെ മുതിര്‍ന്നവരില്‍ മികച്ച ആയുധം. എന്നാല്‍ കുട്ടികള്‍ക്ക് ഒരിക്കല്‍ കോവിഡ് വന്നാല്‍ പിന്നെ വാക്‌സീന്‍ എടുക്കേണ്ടതില്ലെന്ന തെറ്റിദ്ധാരണ ചില മാതാപിതാക്കള്‍ക്കുണ്ടെന്ന് പ്രഫ. സാറ ചൂണ്ടിക്കാട്ടി.  പ്രകൃതിദത്ത പ്രതിരോധത്തിന് പുറമേ അധിക സംരക്ഷണമെന്ന നിലയില്‍ കുട്ടികള്‍ക്ക് വാക്‌സീന്‍ കൂടി നല്‍കാന്‍ മാതാപിതാക്കള്‍ ശ്രദ്ധിക്കണമെന്നും പഠനത്തിന്റെ അടിസ്ഥാനത്തില്‍ പ്രഫ. സാറ കൂട്ടിച്ചേര്‍ത്തു.