മാനന്തവാടി: വയനാട് മെഡിക്കൽ കോളേജ് നിർമാണത്തിനായി ഭൂമി അനുവദിച്ച് സർക്കാർ ഉത്തരവിറക്കി. ബോയ്‌സ് ടൗണിൽ ഗ്ലെൻലോവൻ എസ്‌റ്റേറ്റിൽ നിന്നും സർക്കാർ ഏറ്റെടുത്ത 65 ഏക്കർ ഭൂമിയാണ് മെഡിക്കൽ കോളേജ് നിർമാണത്തിനായി അനുവദിച്ച് അഡീഷണൽ ചീഫ് സെക്രട്ടറി ഡോ. ആശ തോമസ് ഉത്തരവ് ഇറക്കിയത്. കഴിഞ്ഞവർഷം ഫെബ്രുവരിയിൽ മാനന്തവാടി ജില്ലാ ആസ്പത്രിയെ താൽക്കാലികമായി മെഡിക്കൽ കോളേജായി ഉയർത്തിയിരുന്നു.

മാനന്തവാടി ജില്ലാ ആസ്പത്രിക്ക് നിലവിൽ 8.74 ഏക്കർ ഭൂമി മാത്രമാണ് കൈവശമുള്ളത്. മെഡിക്കൽ കോളേജ് പ്രവർത്തിക്കുന്നതിന് കൂടുതൽ സ്ഥലം ആവശ്യമുള്ളതിന്റെ ഭാഗമായാണ്‌ പുതിയ ഉത്തരവ് ഇറങ്ങിയത്. മെഡിക്കൽ കോളേജ് പ്രവർത്തനത്തിനായി 125 അധ്യാപക തസ്തികകളും, 15 അനധ്യാപക തസ്തികകളും സൃഷ്ടിച്ച് സർക്കാർ ഉത്തരവ് നേരത്തേ ഇറങ്ങിയിരുന്നു.ജില്ലാ കലക്ടർ ചെയർമാനായി 12 അംഗ എക്‌സിക്യൂട്ടീവ് കമ്മിറ്റിയും നിലവിൽ പ്രവർത്തിക്കുന്നുണ്ട്.

മെഡിക്കൽ കോളേജിൽ 150 വിദ്യാർഥികൾക്ക്‌ പഠിക്കാനുള്ള കെട്ടിടവും 500 ബെഡ്ഡുകളുള്ള അനുബന്ധ കെട്ടിടവും നിർമിക്കും. 2,48,009 സ്ക്വയർ മീറ്റററിലാണ്‌ കെട്ടിടം സജ്ജമാക്കുക.സ്ഥലം ഏറ്റെടുത്ത് ഉത്തരവായതോടെ നിർമാണപ്രവൃത്തികളിലേക്ക്‌‌ ഉടൻ കടക്കാൻ കഴിയും. ജില്ലയുടെ ആരോഗ്യമേഖലയുടെ ചരിത്രത്തിലെ ഏറ്റവും വലിയ കുതിപ്പായി മാറും മെഡിക്കൽ കോളേജ്‌. ജില്ലയിലെ ചികിത്സാ സൗകര്യങ്ങളുടെ പരിമിതിയും മറികടക്കും. 308 കോടി 80 ലക്ഷം രൂപയാണ് പദ്ധതിയുടെ എസ്‌റ്റിമേറ്റ്‌. അക്കാദമിക് ബ്ലോക്ക്, സ്റ്റാഫ് ക്വാർട്ടേഴ്സ്, സ്റ്റുഡന്റ്‌സ് ഹോസ്റ്റൽ, കോളേജ് സപ്പോർട്ട് സർവീസ് എന്നിവയടങ്ങുന്നതാണ് കെട്ടിട സമുച്ചയം.

കണ്ണൂർ അന്താരാഷ്ട്ര എയർപോർട്ടിൽനിന്നും 58 കിലോമീറ്ററും കോഴിക്കോട് എയർപോർട്ടിൽനിന്ന്‌ 120 കിലോമീറ്ററും തലശേരി റെയിൽവേ സ്റ്റേഷനിൽനിന്ന്‌ 67 കിലോമീറ്ററുമാണ് ദൂരം കണക്കാക്കുന്നത്‌.മെഡിക്കൽ കോളേജ് യാഥാർഥ്യമാവുന്നത് കണ്ണൂർ ജില്ലയിലെ പേരാവൂർ, കണിച്ചാർ, കോളയാട്, കേളകം, കൊട്ടിയൂർ പഞ്ചായത്ത് പരിധിയിലുള്ളവർക്ക് ഏറെ ഉപകാരപ്പെടും.