പേരാവൂർ: പേരാവൂർ സെയ്ന്റ് ജോസഫ് ഫൊറോന പള്ളിയെ തലശ്ശേരി അതിരൂപതയിലെ ആദ്യത്തെ സീറോ മലബാർ മേജർ ആർക്കി എപ്പിസ്‌കോപ്പൽ തീർഥാടനകേന്ദ്രമായി പ്രഖ്യാപിച്ചു. ഫൊറോന പള്ളിയിൽ നടന്ന ചടങ്ങിൽ സീറോമലബാർ സഭ മേജർ ആർച്ച് ബിഷപ്പ് കർദിനാൾ മാർ ജോർജ് ആലഞ്ചേരിയാണ് സെയ്ന്റ് ജോസഫ് പള്ളിയെ തീർഥാടന കേന്ദ്രമായി പ്രഖ്യാപിച്ചത്. ഫൊറോന വികാരി ഡോ.തോമസ് കൊച്ചുകരോട്ടിനെ അതിരൂപതയിലെ ഏക ആർച്ച് പ്രീസ്റ്റ് പദവിയിലേക്ക് ഉയർത്തിയതിന്റെ പ്രഖ്യാപനവും നടത്തി.

തീർഥാടന കേന്ദ്രമായി ഉയർത്തിക്കൊണ്ടുള്ള ഡിക്രി വായന സീറോ മലബാർ സഭ കൂരിയ ചാൻസിലർ ഫാ.വിൻസന്റ് ചെറുവത്തൂരും മലയാള പരിഭാഷ അതിരൂപത ചാൻസിലർ ഫാ.തോമസ് തെങ്ങുംപള്ളിലും നിർവഹിച്ചു. അതിരൂപത ആർച്ച് ബിഷപ്പ് മാർ ജോർജ് ഞരളക്കാട്ട്, അതിരൂപത നിയുക്ത മെത്രാപ്പോലീത്ത മാർ ജോസഫ് പാംപ്ലാനി, അതിരൂപത മുൻ ആർച്ച് ബിഷപ്പ് മാർ ജോർജ് വലിയമറ്റം എന്നിവർ സംസാരിച്ചു. തുടർന്ന് ആഘോഷമായ തിരുനാൾ കുർബാന, നൊവേന, വചന സന്ദേശം എന്നിവയും നടന്നു.