കണ്ണൂർ :അഡ്വ. പി സന്തോഷ് കുമാർ സിപിഐയുടെ രാജ്യസഭാ സ്ഥാനാര്‍ത്ഥി.ചൊവ്വാഴ്ച ചേര്‍ന്ന സംസ്ഥാന എക്‌സിക്യൂട്ടീവ് യോഗമാണ് സ്ഥാനാര്‍ത്ഥിത്വം തീരുമാനിച്ചത്.

സി.പി.ഐ കണ്ണൂർ ജില്ലാ സെക്രട്ടറിയും സംസ്ഥാന കൗൺസിൽ അംഗവുമായ പി സന്തോഷ് കുമാർ എ.ഐ.വൈ.എഫ് ദേശീയ പ്രസിഡന്റ്, ജനറൽ സെക്രട്ടറി എന്നീ നിലകളിൽ പ്രവർത്തിച്ചിട്ടുണ്ട്.സിപിഐ ദേശീയ കൗൺസിൽ അംഗമായിരുന്നു. വിദ്യാർത്ഥി യുവജന സംഘടനകളിലൂടെയാണ് രാഷ്ട്രീയ രംഗത്ത് എത്തിയത്.

എഐഎസ്എഫ് യൂണിറ്റ് സെക്രട്ടറി ജില്ലാ സെക്രട്ടറി, പ്രസിഡന്റ് സംസ്ഥാന പ്രസിഡന്റ് സെക്രട്ടറി എഐവൈഎഫ് കണ്ണൂർ ജില്ലാ സെക്രട്ടറി, സംസ്ഥാന ജോയിന്റ് സെക്രട്ടറി, സിപിഐ തളിപ്പറമ്പ് മണ്ഡലം സെക്രട്ടറി എന്നീ നിലകളിലും പ്രവർത്തിച്ചു. 2011ൽ ഇരിക്കൂർ മണ്ഡലത്തിൽ നിന്നും നിയമസഭയിലേക്കും 2005 ൽ കണ്ണൂർ ജില്ലാ പഞ്ചായത്തിലേക്കും മത്സരിച്ചിട്ടുണ്ട്.

പഞ്ചായത്ത് എൻ.ജി.ഒ ഫെഡറേഷൻ നേതാവായിരുന്ന പടിയൂരിലെ കെ.പി. പ്രഭാകരന്റെയും പി.വി രാധയുടെയും മകനാണ്.ചിറ്റാരിപ്പറമ്പ് ഹൈസ്ക്കൂൾ, ശ്രീകണ്ഠപുരം എസ്.ഇ.എസ് കോളജ്, കണ്ണൂർ എസ്.എൻ.കോളജ്, തിരുവനന്തപുരം ലോ അക്കാദമി എന്നിവിടങ്ങളിൽ വിദ്യാഭ്യാസം.സാമ്പത്തിക ശാസത്രത്തിലും നിയമത്തിലും ബിരുദമെടുത്ത സന്തോഷ് കുമാർ തളിപ്പറമ്പ് ബാറിൽ അഭിഭാഷകനായിരുന്നു.

ഹൈസ്ക്കൂൾ അധ്യാപിക എം ലളിതയാണ് ഭാര്യ.
ഹൃദ്യ, ഋത്വിക് എന്നിവർ മക്കൾ.