കണ്ണൂര്‍: കണ്ണൂരില്‍വെച്ച് പിടികൂടിയ എം.ഡി.എം.എ കേസിലെ മുഖ്യ പ്രതി പോലീസ് പിടിയിലായി. കണ്ണൂർ തെക്കി ബസാർ റാബിയ മൻസിലിൽ നിസാം അബ്ദുള്‍ ഗഫൂറാണ് ( 35) അറസ്റ്റിലായത്. സിറ്റി പോലീസ് കമ്മീഷണര്‍ ആർ. ഇളങ്കോ രൂപീകരിച്ച സബ് ഇന്‍സ്പെക്ടര്‍ പി.കെ. സുമേഷിന്‍റെ നേതൃത്വത്തിലുള്ള പ്രത്യേക അന്വേഷണ സംഘമാണ് പ്രതിയെ പിടികൂടിയത്. എം.ഡി.എം.എ കടത്തിയ ബല്‍ക്കീസ്, അഫ്സല്‍ എന്നിവരെ പിടികൂടിയ വാര്‍ത്ത വന്നതിനുശേഷം പല സ്ഥലങ്ങളില്‍ ഒളിവില്‍ കഴിഞ്ഞു വരികയായിരുന്നു നിസാം.

ശാസ്ത്രീയമായ അന്വേഷണത്തിനൊടുവിലാണ് മഞ്ചേശ്വരം ഹൊസങ്കടിയില്‍ വച്ച് നിസ്സാം പിടിയിലാകുന്നത്. എസ്.ഐ.മാരായ റാഫി, മഹിജന്‍, എ.എസ്.ഐ.മാരായ രഞ്ജിത്, അജയന്‍, മിഥുന്‍ തുടങ്ങിയവരും പ്രത്യേക അന്വേഷണ സംഘത്തില്‍ ഉണ്ടായിരുന്നു.

പ്രതിയുടെ ബാങ്ക് അകൗണ്ടുകള്‍ പോലീസ് മരവിപ്പിച്ചിട്ടുണ്ട്. ഓരോ മാസവും പ്രതിയുടെ ബാങ്ക് അക്കൗണ്ടിലേക്ക് ഒരു കോടിക്ക് മുകളിലുള്ള പണമിടപാടുകള്‍ നടക്കുന്നതായി പോലീസ് പരിശോധനയില്‍ കണ്ടെത്തി. നേരത്തെ ബാംഗ്ലൂരില്‍വെച്ച് കഞ്ചാവ് പിടികൂടിയ കേസില്‍ നിസാം ആറ് മാസം ജയില്‍ ശിക്ഷ അനുഭവിച്ചിട്ടുണ്ട്. മയക്കുമരുന്ന് വില്‍പ്പനയിലെ പണം കൊണ്ട് ആഡംബര ജീവിതം നയിച്ചു വരികയായിരുന്നു ഇയാൾ. കണ്ണൂരിലെ മയക്കുമരുന്ന് കേസ്സുകള്‍ ഉള്‍പ്പെടെ ഏഴു കേസ്സുകള്‍ കേരളത്തിലും മറ്റ് സംസ്ഥാനങ്ങളിലുമായി ഇയാളുടെ പേരിൽ നിലവിലുണ്ട്. കേരളത്തില്‍ മലബാര്‍ മേഖലകളില്‍ പുതുതലമുറ മയക്കുമരുന്നുകളുടെ മൊത്തവിതരണക്കാരനാണ് നിസ്സാം. ഇപ്പോള്‍ പോലീസ് കസ്റ്റഡിയിലായ പ്രതികള്‍ക്ക് പുറമെ കൂടുതല്‍ പേര്‍ക്ക് ഈ കേസുമായി ബന്ധമുണ്ടെന്നും ഇനിയും അറസ്റ്റ് ഉണ്ടാകുമെന്നും സിറ്റി പോലീസ് കമ്മീഷണര്‍ ആർ. ഇളങ്കോ അറിയിച്ചു.