ഉഷ്‌ണം ഉഷ്‌ണേന ശാന്തി എന്ന പഴഞ്ചൊല്ല് ശരി തന്നെയെന്നാണ് ആയൂർവേദ വിദഗ്‌ധരും പറയുന്നത്. കനത്ത ചൂടിൽ നിന്ന് വന്ന ഉടനെ ഫ്രിഡ്ജിൽ നിന്ന് തണുത്ത വെള്ളം എടുത്ത് മടമടാ കുടിക്കുന്നവർ ജാഗ്രത. ഹാനികരമെന്ന് മാത്രമല്ല, തൊണ്ട, ഉദര രോഗങ്ങൾ കൂടെ വരും. ദാഹത്തിന് തിളപ്പിച്ചാറ്റിയ വെള്ളം തന്നെയാണ് ഏറ്റവും നല്ലത്. നന്നാറി വെള്ളവും സംഭാരവുമാണെങ്കിൽ ഏറെ നല്ലത്. ഇവ വീടുകളിൽ ഉണ്ടാക്കാൻ എളുപ്പമാണ്. ബ്രഹ്‌മി, മുത്തിൾ (അധികമാകരുത് കയ്‌പുണ്ടാകും) മുക്കുറ്റി, ഇളം പേരയില, മല്ലി, ജീരകം, തുളസി, പുതിന തുടങ്ങിയവ ചേർക്കാം. കരിക്കിൻ വെള്ളം ചൂടുകാലത്തിന്റെ പ്രധാന രക്ഷകനാണ്. ഇത്രയും മിനറലുകൾ പ്രകൃതിയിൽ വേറൊരിടത്തും കലക്കിവച്ചിട്ടില്ല.

പഞ്ചസാര ചേർത്ത് കലക്കിവച്ചിരിക്കുന്ന പഴജ്യൂസുകൾ കഴിക്കരുത്. ദാഹം ഇരട്ടിയാകും. പഞ്ചസാരയും ഐസും വേണ്ടെന്ന് പറയുന്നത് ശീലമാക്കുക. വേനൽ കനക്കുമ്പോൾ ഭക്ഷണരീതിയിലൂം ആവശ്യമായ മാറ്റങ്ങൾ വരുത്തേണ്ടതുണ്ടെന്നാണ് ആയൂർവേദ ഡോക്‌ടർമാർ പറയുന്നത്. മിതമായ ആഹാരമായിരിക്കും ഉഷ്‌ണകാലത്ത് നന്നായിരിക്കുക. കഴിയുന്നത്ര എളുപ്പം ദഹിക്കുന്ന ഭക്ഷണങ്ങളാണ് ഇപ്പോൾ നല്ലത്. ജലാംശം കൂടുതലുള്ള പച്ചക്കറികളും പുളിയില്ലാത്ത പഴവർഗങ്ങളുമാണ് ഉഷ്‌ണകാലത്ത് ഉപയോഗിക്കുവാൻ ഏറ്റവും അനുയോജ്യം. വെള്ളരി, കുമ്പളങ്ങ, പടവലം, കക്കിരി പഴ വർഗങ്ങളിൽ ചക്ക, മാങ്ങ, തണ്ണിമത്തൻ, ഞാലിപ്പൂവൻ എന്നിവ ചുടുകാലത്തേക്ക് അനുയോജ്യമായവയാണ്.

ഔഷധ മൂല്യം പകർന്ന് നെല്ലിക്ക ജ്യൂസ്

‘ആദ്യം കയ്‌ക്കും, പിന്നെ മധുരിക്കും നെല്ലിക്കയുടെ മാത്രം പ്രത്യേകതയാണിത്. നിത്യജീവിതത്തിൽ ആഴത്തിൽ വേരൂന്നി ആരോഗ്യ മധുരം നൽകുന്ന നെല്ലിക്കായെ ജ്യൂസ് ആക്കിയാലോ? വിപണിയിൽ വില കുറഞ്ഞു കിട്ടുന്ന ഔഷധ ഫലമാണ് നെല്ലിക്ക. നെല്ലിക്ക കുരു കളഞ്ഞ് പഞ്ചസാരയും അൽപം ഇഞ്ചിയും ചേർത്ത് മിക്‌സിയിലോ ജ്യൂസ് മേക്കറിലോ അടിച്ച് ജ്യൂസാക്കി നോക്കൂ. രുചിയും ആരോഗ്യവും ഒരു പോലെ പകരും.

കറിവേപ്പില, ഇഞ്ചി, നാരകയില, പച്ചമുളക് എന്നിവ ചതച്ചിട്ട് അൽപം ഉപ്പുചേർത്ത് തയാറാക്കുന്ന സംഭാരത്തിന് വേനലിൽ രക്ഷകന്റെ വേഷമാണ്. ദഹനരസവും രുചിയും കൂട്ടും. ആഹാരത്തിനോട് താൽപര്യമുണ്ടാക്കും. കഫവാത ദോഷങ്ങളെ ശമിപ്പിക്കുന്നതാണ് മോര്. ആപ്പിൾ, ഓറഞ്ച്, പേരയ്‌ക്ക, പപ്പായ എന്നിവ പ്രമേഹരോഗികൾക്ക് കഴിക്കാവുന്ന പഴങ്ങളാണ്. ഇവ മധുരം ചേർക്കാതെ ജ്യൂസ് ആക്കി കഴിക്കാം.