ന്യൂഡൽഹി : ഇന്ത്യയിൽ 12–14 പ്രായക്കാർക്ക് കൂടി കോവിഡ് വാക്‌സിൻ നൽകാൻ തീരുമാനം. നാളെ മുതൽ കുത്തിവയ്പ് തുടങ്ങും. ഹൈദരാബാദിലെ ‘ബയോളജിക്കൽ–ഇ’ കമ്പനി വികസിപ്പിച്ച കോർബെവാക്സ് വാക്‌സിനാണ് നൽകുകയെന്നും ആരോഗ്യമന്ത്രാലയം അറിയിച്ചു.

നിലവിൽ 15 വയസ്സ് മുതലുള്ളവർക്കു മാത്രമാണ് ഇന്ത്യയിൽ കോവിഡ് വാക്‌സിൻ നൽകുന്നത്. ചൈന ഉൾപ്പെടെ ചില ഏഷ്യൻ രാജ്യങ്ങളിലും ചില യൂറോപ്യൻ രാജ്യങ്ങളിലും വീണ്ടും കോവിഡ് വ്യാപിക്കുന്നതിനിടെയാണ് വാക്‌സിൻ നയത്തിലെ നിർണായക മാറ്റം. 

60 വയസ്സിനു മുകളിലുള്ള എല്ലാവർക്കും നിബന്ധനകളില്ലാതെ ബൂസ്റ്റർ ഡോസ് കുത്തിവയ്പെടുക്കാമെന്നും ആരോഗ്യമന്ത്രാലയം അറിയിച്ചു. 60നു മുകളിൽ പ്രായമുള്ളവരിലെ മറ്റു ഗുരുതര രോഗമുള്ളവർക്ക് മാത്രമാണ് നിലവിൽ ബൂസ്റ്റർ ഡോസെടുക്കാൻ അനുമതിയുള്ളത്. 

2008, 2009, 2010 വർഷങ്ങളിലായി ജനിച്ച 12 വയസ്സിനു മുകളിലുള്ളവർക്കെല്ലാം വാക്‌സിന് അർഹതയുണ്ട്. 15–18 പ്രായക്കാർക്ക് ജനുവരി മുതൽ വാക്‌സിൻ നൽകുന്നുണ്ട്.

കേരളത്തിൽ 12–14 പ്രായക്കാർ 15 ലക്ഷം

തിരുവനന്തപുരം ∙ കേരളത്തിൽ 12–14  പ്രായപരിധിയിൽ കോവിഡ് വാക്സീൻ നൽകേണ്ട 15 ലക്ഷത്തോളം കുട്ടികളുണ്ടാവുമെന്ന് ആരോഗ്യ വകുപ്പിന്റെ പ്രാഥമിക കണക്ക്. ഈ പ്രായപരിധിയിലുള്ളവർക്ക് നൽകുന്ന കോർബെവാക്സ് വാക്സീന്റെ 10,24,700 ഡോസ് ലഭ്യമാണെന്നു മന്ത്രി വീണാ ജോർജ് അറിയിച്ചു

കോർബെവാക്സ്

28 ദിവസത്തെ ഇടവേളയിൽ നൽകുന്ന 2 ഡോസ് വാക്‌സിനാണ് കോർബെവാക്സ്. ട്രയൽ ഡേറ്റ പുറത്തുവിട്ടിട്ടില്ലെങ്കിലു‍ം 90% ഫലപ്രാപ്തിയുണ്ടെന്ന് കമ്പനി അവകാശപ്പെടുന്നു.   

സാധാരണ റഫ്രിജറേറ്റർ തണുപ്പിൽ സൂക്ഷിക്കാം. വാക്‌സിൻ സാങ്കേതിക ഉപദേശക സമിതിയുടെ ശുപാർശയുടെ അടിസ്ഥാനത്തിലാണ് 12–14 പ്രായക്കാർക്ക് കോർബെവാക്സ് മാത്രം നൽകുന്നതെന്ന് ആരോഗ്യമന്ത്രാലയം വ്യക്തമാക്കി.