മണത്തണ: പേരാവൂർ താലൂക്കാസ്പത്രിയുടെ വികസനം തടസ്സപ്പെടുത്തുന്ന രണ്ട് ഗവ.ഡോക്ടർമാർക്കെതിരെ നടപടിയെടുക്കണമെന്നാവശ്യപ്പെട്ട് പേരാവൂർ ഫോറം വാട്ട്‌സാപ്പ് കൂട്ടായ്മ അധികൃതർക്ക് പരാതി നല്കി.വിജിലൻസ് ആൻഡ് ആന്റി കറപ്ഷൻ ബ്യൂറോ കണ്ണൂർ,ജില്ലാ കലക്ടർ കണ്ണൂർ,താലൂക്ക് തഹസിൽദാർ (ലാൻഡ് & റവന്യൂ) ഇരിട്ടി എന്നിവർക്കാണ് പേരാവൂർ ഫോറം രേഖാമൂലം പരാതി നല്കിയത്.

പേരാവൂർ താലൂക്ക് ആസ്പത്രി വികസനം രണ്ട് സർക്കാർ ഡോക്ടർമാർ തടയുന്ന അവസ്ഥയാണ് നിലവിലെന്ന് പരാതിയിൽ പറയുന്നു.ആസ്പത്രി മാസ്റ്റർപ്ലാനിന് എതിരെ സർക്കാർ ഡോക്ടർമാരായ ഡോ.രവീന്ദ്രനും ഡോ.സദാനന്ദനും ഹൈക്കോടതിയിൽ കേസ് പോവുകയും സ്റ്റേ വാങ്ങുകയും ചെയ്തുവെന്നും പരാതിയിലുണ്ട്.

നിലവിൽ ഈ ഡോക്ടർമാർ അനധികൃതമായി ആസ്പ്രതി സ്ഥലം അവരുടെ വീട്ടിലേക്കുള്ള വഴിയായി ഉപയോഗിക്കുകയും സ്വകാര്യ പ്രാക്ടീസ് നടത്തുന്നതിനും ഉപയോഗിക്കുന്നുണ്ടെന്ന് പരാതിയിൽ പറയുന്നു.ആസ്പത്രി ഭൂമിയിലെ റോഡ് പൊതുവഴിയാണെന്ന് കാണിച്ച് ഒരു ഡോക്ടർ ആസ്പത്രി സ്ഥലത്തിന് സമീപം വാണിജ്യ സമുച്ചയം പണിയുകയും പേരാവൂർ പഞ്ചായത്തിൽ നിന്ന് അനധികൃതമായി ലൈസൻസെടുക്കുകയും ചെയ്തിട്ടുണ്ടെന്നും പരാതിയിലുണ്ട്.

സർക്കാർ പദ്ധതിക്കെതിരെ ഹൈക്കോടതിയിൽ കേസ് കൊടുക്കുകയെന്ന തെറ്റായ കാര്യം ഇരു ഡോക്ടർമാർ ചെയ്തിട്ടും നടപടികൾ വന്നിട്ടില്ല.പേരാവൂർ ആസ്പത്രിയിലെ കോവിഡ് ഐ.സി.യു നിർമാണം ഇവർ തടയുകയും കരാറുകാരൻ പേരാവൂർ പോലീസ്,ജില്ലാ മെഡിക്കൽ ഓഫീസർ എന്നിവർക്ക് പരാതി നൽകുകയും ചെയ്തിട്ടും യാതൊരു നടപടികളും ഉണ്ടായിട്ടില്ലെന്നും പരാതിയിൽ പറയുന്നു.

ആസ്പത്രി വികസനവുമായി ബന്ധപ്പെട്ട ഏത് പ്രവൃത്തിയും തടയുകയെന്ന ഗുരുതരമായ തെറ്റാണ് ഈ രണ്ട് സർക്കാർ ഡോക്ടർമാർ ചെയുന്നതെന്നും ഇതിന്മേൽ അന്വേഷണം നടത്തി വസ്തുതകൾ പുറത്തുകൊണ്ടുവരണമെന്നും പേരാവൂർ ഫോറം അംഗങ്ങൾ ആവശ്യപ്പെട്ടു.

കൂട്ടായ്മയിലെ അംഗങ്ങളായ ബേബി കുര്യൻ,സന്തോഷ് പാമ്പാറ,എബി ജോൺ,ആനന്ദ് കൃഷ്ണൻ,ബിനീഷ് നാമത്ത്,സിജോ പേരാവൂർ,സി.എം.ജോസഫ്,പി.പി.മനോജ് കുമാർ എന്നിവരാണ് രണ്ട് ഡോക്ടർമാർക്കുമെതിരെ അന്വേഷണമാവശ്യപ്പെട്ട് അധികൃതർക്ക് പരാതി നല്കിയത്.