ഇരിട്ടി: “എന്റെ പായം മാലിന്യമുക്ത പായം” പരിപാടിയുടെ ഭാഗമായി പായം പഞ്ചായത്തിന്റെ നേതൃത്വത്തിൽ ഇരിട്ടി പാലം മുതൽ വള്ളിത്തോട് ആശുപത്രിവരെയുള്ള കെ.എസ്.ടി.പി. റോഡിന്റെ ഇരുവശവും ശുചീകരിക്കും. ജനകീയ പങ്കാളിത്തത്തോടെയുള്ള ശുചീകരണപ്രവൃത്തി 12-ന് ഇരിട്ടി പാലത്തിന് സമീപം പഞ്ചായത്ത് പ്രസിഡന്റ് പി. രജനി ഉദ്ഘാടനം ചെയ്യും.

മാലിന്യമുക്ത പായം പദ്ധതിയുടെ ഭാഗമായി പഞ്ചായത്തിലെ 18 വാർഡുകളിൽനിന്നായി 15 ടൺ മാലിന്യം ശേഖരിച്ച് ക്ലീൻ കേരള കമ്പനിക്ക് നൽകിയിട്ടുണ്ട്. എല്ലാ വാർഡുകളിലും ശുചീകരണപ്രവർത്തനങ്ങൾ കൃത്യമായി അവലോകനം ചെയ്ത് നടപ്പിലാക്കുന്നതായും പഞ്ചായത്ത് പ്രസിഡന്റ് പി. രജനി പത്രസമ്മേളനത്തിൽ പറഞ്ഞു. 18 വാർഡുകളിലും പ്ലാസ്റ്റിക് ബോട്ടിൽ ബൂത്തുകളും സ്ഥാപിച്ചു.

42 ഹരിതകർമസേനാംഗങ്ങൾ എല്ലാ വീടുകളും സ്ഥാപനങ്ങളും സന്ദർശിച്ച്‌ മാലിന്യശേഖരണം നടത്തിവരികയാണ്. ഇരിട്ടി പാലംമുതൽ വള്ളിത്തോട് ആശുപത്രിവരെയുള്ള 15 കിലോമീറ്റർ ശുചീകരണത്തിന് പഞ്ചായത്തംഗങ്ങൾ, സി.ഡി.എസ്., എ.ഡി.എസ്. അംഗങ്ങൾ, കുടുംബശ്രീ പ്രവർത്തകർ ഹരിതകർമസേന, പോലീസ്, എൻ.എസ്.എസ്. വളന്റിയർമാർ രാഷ്ട്രീയ-സാംസ്കാരിക സംഘടനകൾ, യുവജനസംഘടനകൾ, വ്യാപാരികൾ എന്നിവർ പരിപാടിയിൽ പങ്കെടുക്കും. പഞ്ചായത്ത് വൈസ് പ്രസിഡന്റ് എം. വിനോദ് കുമാർ, വി. പ്രമീള, പി. സാജിദ്, ഷൈജൻ ജേക്കബ് എന്നിവർ പത്രസമ്മേളനത്തിൽ പങ്കെടുത്തു.