തിരുവനന്തപുരം : കുട്ടികൾക്ക്‌ ഇംഗ്ലീഷ്‌ ഭാഷാ പ്രാവീണ്യം നേടാൻ സഹായിക്കുന്ന കൈറ്റിന്റെ ഇ–ലാംഗ്വേജ്‌ ലാബ്‌ സജ്ജമാകുന്നു. നിലവിലെ പാഠ്യപദ്ധതിയെയും പഠനപ്രക്രിയയെയും അടിസ്ഥാനമാക്കി ആസ്വാദ്യകരമായി ഇംഗ്ലീഷ് പഠിക്കാൻ സഹായിക്കുന്ന തരത്തിലാണ്‌ ലാബ്‌. കൈറ്റ്‌ തയ്യാറാക്കിയ ഇന്ററാക്ടീവ് മൾട്ടി മീഡിയ സ്വതന്ത്ര സോഫ്റ്റ്‌വെയറിലൂടെയാണ്‌ ഇംഗ്ലീഷ്‌ പഠനം.  കംപ്യൂട്ടർ ഗെയിം പോലെയാണ്‌ മിക്ക പഠനപ്രവർത്തനങ്ങളും. ഒന്നുമുതൽ ഏഴുവരെ ക്ലാസുകളിലെ കുട്ടികൾക്ക് നാലു തലത്തിലുള്ള ഉള്ളടക്കവുമായാണ് ആദ്യഘട്ട പ്രവർത്തനം.

ഹൈടെക് സ്‌കൂൾ, ഹൈടെക് ലാബ് പദ്ധതികളുടെ തുടർച്ചയായി പൊതുവിദ്യാഭ്യാസ വകുപ്പ് ആവിഷ്‌കരിച്ച ‘ഇ-ക്യൂബ് ഇംഗ്ലീഷ്’ പദ്ധതിയുടെ ഭാഗമായാണ്‌ ലാബ്‌. സ്റ്റുഡന്റ് മൊഡ്യൂളിനു പുറമെ വിദ്യാർഥികളെ വിലയിരുത്താൻ അധ്യാപകരെ സഹായിക്കുന്ന ടീച്ചിങ്‌ മൊഡ്യൂളും പ്രഥമാധ്യാപകർക്ക് അവലോകനത്തിനുള്ള പ്രത്യേക മൊഡ്യൂളും ഉണ്ട്. ഓരോ ഘട്ടത്തിലും കുട്ടി നേടേണ്ട അറിവിനെ അടിസ്ഥാനമാക്കിയാണ് ഇവയുടെ ക്രമീകരണം. ഇ–ലൈബ്രറിയും കൈറ്റ് വിക്‌ടേഴ്‌സിൽ ഇ–ബ്രോഡ്കാസ്റ്റും ഒരുക്കിയതിന്റെ തുടർച്ചയാണ് ഇ–ലാംഗ്വേജ് ലാബ്. സ്‌കൂളുകളിലെ 1.2 ലക്ഷം ലാപ്‌ടോപ്പിലും ഇത്‌ ഒരുക്കാനാകുമെന്ന് കൈറ്റ് സി.ഇ.ഒ കെ. അൻവർ സാദത്ത് പറഞ്ഞു. സർക്കാരിന്റെ നൂറുദിന പരിപാടിയിലാണ്‌ പദ്ധതി എല്ലാ സ്‌കൂളുകളിലേക്കും വ്യാപിപ്പിക്കുന്നത്‌. ഇതിന്റെ ഉദ്ഘാടനം വെള്ളിയാഴ്‌ച പൂജപ്പുര ജി.യു.പി.എസിൽ പകൽ 3.30ന് വിദ്യാഭ്യാസ മന്ത്രി വി. ശിവൻകുട്ടി നിർവഹിക്കും.