ഇരിട്ടി : കണ്ണൂർ ജില്ലയിലെ രണ്ടാമത്തെ ജല വൈദ്യുത പദ്ധതിയായ ‘പഴശ്ശി സാഗർ മിനി’യുടെ നിർമാണ പ്രവൃത്തി നിലച്ചിട്ട് 6 മാസം പിന്നിടുന്നു. 2020ൽ തുരങ്ക നിർമാണം പൂർത്തിയാക്കുന്നതിനും 2022ൽ കമ്മിഷൻ ചെയ്യുന്നതിനും ലക്ഷ്യമിട്ട് തുടങ്ങിയ പദ്ധതിയുടെ തുരങ്ക നിർമാണ പ്രവൃത്തി പകുതി പോലും പൂർത്തിയാക്കാതെ കരാർ കമ്പനി പിൻവാങ്ങിയതാണ് പ്രതിസന്ധിക്ക് കാരണം. 

പഴശ്ശി പദ്ധതിയിൽ നിന്ന് മഴക്കാലത്ത് വളപട്ടണം പുഴയിലേക്ക് ഒഴുകിപ്പോകുന്ന അധിക ജലം ഉപയോഗിച്ച് 7.5 മെഗാവാട്ട് സ്ഥാപിത ശേഷിയുള്ള ജല വൈദ്യുത പദ്ധതിയാണ് പഴശ്ശി സാഗർ പ്രഖ്യാപിച്ചിരുന്നത്. കെ.എസ്.ഇ.ബി നേരിട്ട് നടപ്പിലാക്കുന്ന പദ്ധതിക്ക് 79.85 കോടിയാണ് ചെലവ് കണക്കാക്കിയത്. 

കൂറ്റൻ പാറകൾ സ്‌ഫോടനത്തിലൂടെ പൊട്ടിച്ചാണ് തുരങ്കം നിർമിച്ചത്. സംഭരണിയിൽ നിന്ന് 80 മീറ്റർ നീളത്തിൽ വലിയ തുരങ്കം നിർമിച്ച് അവിടെ നിന്ന് ചെറിയ മൂന്ന് തുരങ്ക‌ങ്ങൾ വഴി പവർ ഹൗസിലേക്ക് വെള്ളം എത്തിക്കുന്നതിനുള്ള നടപടികൾ മാത്രമാണ് ഇതുവരെ പൂർത്തിയാക്കിയത്. 

സാധാരണ ജല വൈദ്യുത പദ്ധതികൾ പോലെ കൂറ്റൻ അണക്കെട്ടുകളോ കിലോമീറ്റർ നീളത്തിൽ കനാൽ സംവിധാനമോ പഴശ്ശി സാഗറിനില്ല. നിലവിലുള്ള അണക്കെട്ട് തന്നെയാണ് വൈദ്യുതി ഉൽപാദനത്തിനും പ്രയോജനപ്പെടുത്തുന്നത്. തുരങ്കത്തിലൂടെ വെള്ളം പമ്പ് ചെയ്ത് ജനറേറ്റർ പ്രവർത്തിപ്പിക്കുന്ന ആദ്യ പദ്ധതിയാണ് പഴശ്ശി സാഗർ.

പ്രതിവർഷം 25.16 മില്യൻ യൂണിറ്റ് വൈദ്യുതി ഉൽപാദനമാണ് പ്രതീക്ഷിക്കുന്നത്. ഇതിനായി 2.5 മെഗാവാട്ടിന്റെ മൂന്നു ജനറേറ്ററുകളാണ് ഉപയോഗിക്കുക. ജൂൺ മുതൽ നവംബർ വരെയുള്ള 6 മാസമാണ് ഉൽപാദന കാലയളവ്. ഇതിനായി സംഭരണിയുടെ ഷട്ടർ അടച്ച് മഴക്കാലത്ത് പരമാവധി വെള്ളം സംഭരിക്കും.

വൈദ്യുതി ഉൽപാദനത്തിന് ശേഷം ഡാമിന് താഴെയുള്ള പുഴയിലേക്ക് വെള്ളം ഒഴുക്കിവിടും. ജല വിഭവ വകുപ്പിന് കീഴിലുള്ള പഴശ്ശി പദ്ധതിയുടെ 3.05 ഹെക്ടർ സ്ഥലമാണ് ഇതിനായി ഉപയോഗപ്പെടുത്തുന്നത്. 2021 ഒക്ടോബർ മാസമാണ് പ്രവൃത്തി നിർത്തിയത്. ഇപ്പോൾ പദ്ധതി പ്രദേശം കാട് കയറിയ നിലയിലാണ്.