കോട്ടയം : ആനവണ്ടി യാത്ര വൻവിജയമായതോടെ ടൂറിസ്റ്റ് കേന്ദ്രങ്ങളിലേക്കുള്ള കെ.എസ്.ആർ.ടി.സി സർവീസും കൂടി. ബജറ്റ് ടൂറിസം സെല്ലിന്റെ ആഭിമുഖ്യത്തിൽ കെ.എസ്.ആർ.ടി.സി മിക്ക ഡിപ്പോയിൽ നിന്നും യാത്രകളും ഒരുക്കുന്നുണ്ട്. ഇപ്പോഴിതാ പെൺയാത്രികൾക്ക് അടിപൊളി ഓഫറുമായി എത്തിയിരിക്കുകയാണ് കെ.എസ്.ആർ.ടി.സി ബജറ്റ് ടൂർസ്. വനിതാദിനത്തോട് അനുബന്ധിച്ച് മാർ 8 മുതൽ 13 വരെ കെ.എസ്.ആർ.ടി.സി വനിതാ യാത്രാ വാരം – (Womens Travel Week”) ആയി ആഘോഷിക്കുന്നു. വനിതകൾക്ക് മാത്രമായി അടിപൊളി യാത്രാപാക്കേജ് ആണ് ഒരുക്കിയിരിക്കുന്നത്.

കോട്ടയം ഡിപ്പോയിൽ നിന്നുമാണ് വനിതാ സംഘടനകൾക്കും ഗ്രൂപ്പുകൾക്കും ട്രിപ്പുകൾ ക്രമീകരിച്ചിരിക്കുന്നത്. മാര്‍ച്ച് 8ന് വണ്ടർലാ വാട്ടർ തീം പാർക്കിലേക്കാണ് യാത്ര. 525 രൂപ പ്രവേശനഫീസ് ഉൾപ്പടെ 900 രൂപയാണ് ഒരാൾക്ക് ഈടാക്കുന്നത്. ബുക്കിങ് ആരംഭിച്ചു. രാവിലെ 8 മണിക്ക് പുറപ്പെട്ട് രാത്രി 8 മണിക്ക് തിരിച്ചെത്തുന്ന രീതിയിലാണ് യാത്ര ക്രമീകരിച്ചിരിക്കുന്നത്. കൂടാതെ മാർച്ച് 8 മുതൽ 13 വരെയുള്ള ദിവസങ്ങളിൽ കോട്ടയം ഡിപ്പോയിൽ നിന്നും മറ്റുയാത്രകളും വനിതായാത്രികരെ കാത്തിരിക്കുന്നു.

പച്ചവിരിച്ചു നിൽക്കുന്ന മലനിരകളും മൊട്ടക്കുന്നുകളും നിറഞ്ഞ ഹൈറേഞ്ചിന്റെ സൗന്ദര്യം കൺകുളിർക്കെ കാണാം കെ.എസ്.ആർ.ടി.സി ബസ് യാത്രയിലുടനീളം. കോട്ടയം ഡിപ്പോ വാഗമൺ, പരുന്തുംപാറ വിനോദ സഞ്ചാര കേന്ദ്രങ്ങളിലേക്കും ഉല്ലാസ യാത്ര ഒരുക്കിയിട്ടുണ്ട്. കൂടാതെ കാടും വെള്ളച്ചാട്ടങ്ങളും പുഴകളും ആസ്വദിച്ച് മലക്കപ്പാറയിലേക്കും യാത്ര നടത്താം. കൂടുതൽ വിവരങ്ങൾക്ക് 9495876723, 8547832580, 0481-2562908 എന്നീ നമ്പരുകളിൽ വിളിക്കാവുന്നതാണ്.