തിരുവനന്തപുരം: തിരുവനന്തപുരം ആറ്റിങ്ങലിൽ ബൈക്കും ലോറിയും കൂട്ടിയിടിച്ചുണ്ടായ അപകടത്തിൽ ബൈക്ക് യാത്രക്കാരൻ മരിച്ചു. അയിലം സ്വദേശി വിശാൽ (22) ആണ് മരിച്ചത്. മാമം കോരാണിയിൽ രേവതി ഓഡിറ്റോറിയത്തിന് സമീപത്തായിരുന്നു അപകടം. കൊല്ലം ഭാഗത്ത് നിന്ന് തിരുവനന്തപുരത്തേക്ക് സഞ്ചരിക്കുകയായിരുന്ന വാഹനങ്ങളാണ് അപകടത്തിൽപെട്ടത്. കൂടെ ഉണ്ടായിരുന്ന ആറ്റിങ്ങൽ സ്വദേശി ആസിഫിനെ (23) ഗുരുതരാവസ്ഥയിൽ ആശുപത്രിയിൽ പ്രവേശിപ്പിച്ചു. ലോറി ഡ്രൈവർ നിസാര പരിക്കുകളോടെ രക്ഷപ്പെട്ടു. ലോറിയിൽ ഉണ്ടായിരുന്ന മറ്റ് രണ്ട് പേരുടെ നില ഗുരുതരമാണ്. 

ഇന്ന് രാവിലെ എട്ടരയോടെ ആയിരുന്നു അപകടം. വാഹനങ്ങൾ കൂട്ടിയിടിച്ച ശേഷം തീപിടിക്കുകയായിരുന്നു. കാർഗോ കയറ്റി വന്ന ലോറിയും അപകടത്തിൽ പെട്ട ബൈക്കും തിരുവനന്തപുരം ഭാഗത്തേക്ക് വരികയായിരുന്നു. എതിർ ദിശയിൽ നിന്ന് വാഹനത്തെ മറികടന്നുവന്ന മറ്റൊരു വാഹനം ബൈക്കിലിടിക്കുകയും ബൈക്ക് ലോറിക്കടിയിൽ കുടുങ്ങുകയുമായിരുന്നു. ലോറിയിലിടച്ച ബൈക്ക്‌ തീപിടിക്കുകയായിരുന്നു. ബൈക്കിൽനിന്നും തീപടർന്ന ലോറി നടുറോഡിൽ നിന്ന് കത്തുകയായിരുന്നു. ഫയർഫോഴ്സെത്തി തീ അണച്ചെങ്കിലും വാഹനത്തിന്റെ മുൻഭാഗം പൂർണമായും നശിച്ചിരുന്നു. ലോറിയുടെ ടാങ്കറിന്റെ ഭാഗത്ത് ബൈക്ക് ഇടിച്ചതാണ് തീ പിടിക്കാൻ കാരണമായത്. ബൈക്ക് പൂർണമായും കത്തി നശിച്ചു. അപകടത്തിൽപ്പെട്ട രണ്ടുപേരും മരിയൻ എഞ്ചിനീയറിങ്‌ കോളേജ് വിദ്യാർഥികളാണ്.

ബൈക്കിനാണ് ആദ്യം തീപിടിച്ചത്. ഇതിൽ നിന്ന് ലോറിയിലേക്ക് തീ പടർന്നു. ബൈക്കും ലോറിയും പൂർണമായും കത്തിനശിച്ചു. ഫയർ ഫോഴ്സ് എത്തി തീ അണച്ചു.