ചിറ്റൂർ: വലംകൈകൊണ്ട് നൽകുന്നത് ഇടംകൈപോലും അറിയരുതെന്ന ചൊല്ലിനെ പ്രവൃത്തിപഥത്തിലെത്തിക്കുക എളുപ്പമല്ല. കേരളബാങ്കിന്റെ ചിറ്റൂർ ശാഖയിലെ ജീവനക്കാർ ഇത് നടപ്പാക്കിയാണ് മാതൃക കാട്ടിയത്. ബാങ്ക്‌വായ്പ തിരിച്ചടച്ചില്ലെങ്കിൽ ജപ്തിയാണ് നടപടി. എന്നാൽ, വായ്പക്കാരിയുടെ കടം സ്വന്തം ശമ്പളത്തിൽനിന്ന് സമാഹരിച്ച് നൽകി ജപ്തി ഒഴിവാക്കിയ ജീവനക്കാർ പക്ഷേ, സഹായം ലഭിച്ച വായ്പക്കാരിയുടെ പേരോ നൽകിയ തുകയോ വെളിപ്പെടുത്താൻ തയ്യാറല്ല.

കേരള ബാങ്കിന്റെ ചിറ്റൂർ ശാഖയിലെ ജീവനക്കാരും ഏരിയാ മാനേജരുമാണ് വേറിട്ട വഴിയിലൂടെ മാതൃകയായത്. എട്ടുവർഷം മുമ്പാണ് നല്ലേപ്പിള്ളി സ്വദേശിനി ബാങ്കിൽനിന്ന് വായ്പയെടുത്തത്. അധികനാൾ കഴിയുംമുമ്പേ കാൻസർ ബാധിതയായ അവർ മരിക്കയും ചെയ്തു. വായ്പ തിരിച്ചടക്കേണ്ട ചുമതല ഇവരുടെ മകനായി.

2015ലാണ് വായ്പക്കാരി മരിച്ചത്. അന്നുമുതൽ വായ്പ തിരിച്ചടക്കണമെന്നാവശ്യപ്പെട്ട് ബാങ്കിലെ ജീവനക്കാർ ഈ വീട്ടിൽ പോകാറുണ്ടായിരുന്നു. വായ്പക്കാരിയുടെ മകൻ വിവാഹിതനും ചെറിയ കുട്ടികളുടെ പിതാവുമാണ്. കഴിഞ്ഞതവണ വായ്പയുമായി ബന്ധപ്പെട്ട കാര്യം സംസാരിക്കാൻ ജീവനക്കാർ വീട്ടിലെത്തിയപ്പോഴാണ് അയാളും കാൻസർ ബാധിതനാണെന്ന് മനസ്സിലാക്കിയത്. മുൻപ് പല തവണ അവർ ആ വീട്ടിൽ പോയപ്പോഴും അസുഖത്തിന്റെ കാര്യം ആ മകൻ വെളിപ്പെടുത്തിയിരുന്നില്ല. അതോടെ ജീവനക്കാരുടെ മനസ്സലിഞ്ഞു. 

പിന്നീട് ഏരിയാ മാനേജരുടെ നേതൃത്വത്തിൽ ശാഖയിലെ ബ്രഞ്ച് മാനേജർ ഉൾപ്പെടെയുള്ള ഏഴ് ജീവനക്കാർ അവരുടെ ശമ്പളത്തിൽനിന്ന് പിരിവിട്ട് വായ്പക്കാരിയുടെ കടം വീട്ടുകയായിരുന്നു. കഴിഞ്ഞദിവസം ബാങ്കിൽനടന്ന ചടങ്ങിൽ ഇവർക്ക് വയ്പയെടുത്തപ്പോൾ ഈടുവെച്ച ആധാരം കൈമാറി. ഏറെ വൈകാരിക നിമിഷമായിരുന്നു അതെന്ന് ബാങ്കിലെ ജീവനക്കാർ പറയുന്നു. ചികിത്സാസഹായവുമായി ബന്ധപ്പെട്ട കാര്യങ്ങളിൽക്കൂടി സഹായിക്കാനുള്ള ആലോചനയിലാണ് ജീവനക്കാർ.