ആറളം: സ്കൂൾ ലീഡർ തെരഞ്ഞെടുപ്പിൽ ജനാധിപത്യ ഇലക്ഷൻ പ്രകിയകൾ അടുത്തറിയുന്നതിനായി ആറളം എം.ഐ.എം എൽ.പി സ്കൂളിൽ ഇലക്ട്രോണിക് വോട്ടിംഗ് മെഷീൻ ഉപയോഗിച്ച് തെരഞ്ഞെടുപ്പ് നടന്നു. റിട്ടേണിംഗ് ഓഫീസർ കെ. ജയനാഥ് മുമ്പാകെ ‘കുട്ടി സ്ഥാനാനാർഥി’കൾ നാമനിർദേശ പത്രിക സമർപ്പിച്ചു. പത്ത് സ്ഥാനാർഥികളാണ് മത്സര രംഗത്തുണ്ടായിരുന്നത്. മോതിരവും സിംഹവും ഉൾപ്പെടെ സ്ഥാനാർഥികളുടെ ചിഹ്നങ്ങളിലും വ്യത്യസ്തത ഉണ്ടായിരുന്നു.

പ്രിസൈഡിംഗ് ഓഫീസർക്കൊപ്പം മൂന്ന് പോളിംഗ് ഓഫീസർമാരും തെരഞ്ഞെടുപ്പ് നിയന്ത്രിക്കാനുണ്ടായിരുന്നു. ഒന്നാം പോളിംഗ് ഓഫീസർ കുട്ടി വോട്ടർമാരുടെ തിരിച്ചറിയൽ രേഖയായ സ്കൂൾ ഡയറി പരിശോധിക്കുകയും രണ്ടാം പോളിംഗ് ഓഫീസർ വിവരങ്ങൾ രേഖപ്പെടുത്തുകയും ചെയ്തു. മൂന്നാം പോളിംഗ് ഓഫീസർ വിരലിൽ മഷി പുരട്ടി ബാലറ്റ് അനുവദിച്ചു. സ്ഥാനാർഥികളുടെ പേരും ഫോട്ടോയുമടങ്ങിയ ബാലറ്റിൽ കുട്ടി വോട്ടർമാർ സമ്മതിദാനം രേഖപ്പെടുത്തി.

‘ക്രമസമാധാന’ പാലനത്തിന് കുട്ടിപ്പോലീസും സജ്ജമായിരുന്നു. കവാടത്തിൽ വോട്ടർമാരെ സാനിറ്റൈസ് ചെയ്യിക്കാനും ‘നിയമപാലകർ’ മറന്നില്ല. സമാധാനപരമായ തെരഞ്ഞെടുപ്പിന് ശേഷം വിധി പ്രഖ്യാപനം വന്നു. കൂടുതൽ വോട്ട് നേടിയ എൻ.കെ. മുഹമ്മദ് നജാദിനെ സ്കൂൾ ലീഡറായും കെ.എ. ഹവ്വയെ ഡെപ്യൂട്ടി ലീഡറായും സി.എം. മുഹമ്മദ് റിഫാദിനെ ബാലസഭ സെക്രട്ടറിയായും തെരഞ്ഞെടുത്തു.

തെരഞ്ഞെടുപ്പിന് പ്രഥമാധ്യാപകൻ ജോമി ജോബ് അധ്യാപകരായ ടി. സൗദത്ത്, ഇ. ഖദീജ, പി. അജീഷ, കെ. ജയനാഥ്, ജോബിൻ ചാക്കോ, വിദ്യാർഥികളായ ആയിഷത്ത് സ്വാലിഹ, ഇ. കെ. ഷസിൻ, ആലിയ റഷീദ് , സഫ്വാൻ, റാസിൽ, അനസ്, ആയിഷ, സ്വാലിഹ തുടങ്ങിയവർ നേതൃത്വം നൽകി.