തിരുവനന്തപുരം: സമ്പൂർണ ഇ-സ്റ്റാമ്പിങ്ങിലേക്ക് പോകുമ്പോൾ വെണ്ടർമാരെയും ഉൾപ്പെടുത്തിയുള്ള ക്രമീകരണം ഏർപ്പെടുത്താൻ സർക്കാർ. നിലവിൽ മുദ്രപ്പത്രവില ഒരു ലക്ഷത്തിനുമുകളിൽ വരുന്നതിനാണ് ഇ-സ്റ്റാമ്പിങ് നിർബന്ധം. ഇതിൽ താഴെയുള്ളവയ്ക്കും ഇ-സ്റ്റാമ്പിങ് ഏർപ്പെടുത്താനാണ് ഉദ്ദേശിക്കുന്നത്. എന്നാൽ നിശ്ചിത തുകയ്ക്ക് മുകളിലുള്ള ഇ-സ്റ്റാമ്പിങ് വെണ്ടർമാർവഴി വേണമെന്ന ആവശ്യം ഉയർന്നിട്ടുണ്ട്. ഇത് സർക്കാർ പരിഗണിക്കുന്നു. നിലവിൽ ഒരുലക്ഷത്തിനു മുകളിലുള്ള മുദ്രപ്പത്രങ്ങൾക്കുപകരം ഇ-സ്റ്റാമ്പിങ് നടത്തുന്നത് വെണ്ടർമാർ വഴിയാണ്. കഴിഞ്ഞ സർക്കാരിന്റെ കാലത്ത് ജനങ്ങൾക്ക് നേരിട്ട് ഇ-സ്റ്റാമ്പിങ് സൗകര്യം ഏർപ്പെടുത്താൻ ആലോചിച്ചിരുന്നെങ്കിലും ഇടയ്ക്ക് വച്ച് ഉപേക്ഷിച്ചു. വെണ്ടർമാരുടെ തൊഴിൽ സംരക്ഷണംകൂടി കണക്കിലെടുത്തായിരുന്നു ഇത്.

നിലവിൽ സമ്പൂർണ ഇ-സ്റ്റാമ്പിങ്ങിനുള്ള സോഫ്റ്റ്‌വേർ അടക്കം സാങ്കേതികസൗകര്യങ്ങൾ സർക്കാർ ഒരുക്കി. മാർച്ചിൽ ഔദ്യോഗിക പ്രഖ്യാപനമുണ്ടാകും. ചെറിയ തുകയ്ക്കുള്ളതാണെങ്കിലും തങ്ങളിലൂടെയാകണം ഇ-സ്റ്റാമ്പിങ് എന്ന ആവശ്യം വെണ്ടർമാരുടെ സംഘടനകൾ ഉന്നയിക്കുന്നുണ്ട്.

ഇ-സ്റ്റാമ്പിങ് എന്നാൽ

എന്തെങ്കിലും കരാർ രജിസ്റ്റർചെയ്യാനും വസ്തുവും മറ്റും വാങ്ങാനുമുള്ള നികുതി മുദ്രപ്പത്രവിലയായാണ് സർക്കാർ ഈടാക്കുന്നത്. ഇ-സ്റ്റാമ്പിങ് എന്നത് ട്രഷറിയിൽ പണമടച്ച് ഓൺലൈനിലൂടെ പരമ്പരാഗത മുദ്രപ്പത്രങ്ങൾക്കു തുല്യമായ സൗകര്യം ലഭ്യമാകുന്ന സേവനമാണ്. ഓൺലൈൻ പരിശോധനയ്ക്കുശേഷം ഇ-സ്റ്റാമ്പിങ് അനുവദിക്കുകയും ട്രഷറിയിൽനിന്ന് അയച്ചുതരുന്ന നിശ്ചിതതുകയ്ക്കുള്ള മുദ്ര പ്രിന്റ് ചെയ്ത് എടുക്കാവുന്നതുമാണ്.