തിരുവനന്തപുരം : ഉത്സവങ്ങൾക്ക് ആനകളെ എഴുന്നള്ളിക്കാൻ ഇനി ചെലവുകൂടും. വാടകയ്ക്കൊപ്പം 18 ശതമാനം ജി.എസ്.ടി.കൂടി ഈടാക്കാൻ തിരുവിതാംകൂർ ദേവസ്വംബോർഡ് തീരുമാനിച്ചു. ആനയ്ക്കൊപ്പം നെറ്റിപ്പട്ടം, ജീവത എന്നിവയ്ക്കും ജി.എസ്.ടി. നൽകണം.

ബോർഡ് നേരിട്ടുവിൽക്കാത്ത കരാറുകാർവഴി വിൽക്കുന്ന പൂജാ സാധനങ്ങൾക്കും ജി.എസ്.ടി. ബാധകമാക്കി. ഇതോടെ ആനയുടെ വാടകനിരക്കും പൂജാസാധനങ്ങളുടെ വിലയും കൂടും. ബലിത്തറയും പുള്ളുവൻപാട്ടും ജി.എസ്.ടി.യിൽപ്പെട്ടു. വിവാഹരസീതിനെ ഒഴിവാക്കിയതിനാൽ കല്യാണത്തിന് ജി.എസ്.ടി. ഇല്ല.

ബോർഡിനുകീഴിലെ 1250 ക്ഷേത്രങ്ങളിലെ വഴിപാട്, കാണിക്ക, തുലാഭാരം, ഭക്തർ ക്ഷേത്രങ്ങളിൽ സമർപ്പിക്കുന്ന സാധനങ്ങളുടെ വിൽപ്പന, കൃഷിയിലെ ആദായം തുടങ്ങിയവ ജി.എസ്.ടി. പരിധിയിൽനിന്ന് ഒഴിവാക്കി. ആനകളുടെ വാടകനിരക്കും നിശ്ചയിച്ചു. തലപ്പൊക്കം, ആവശ്യക്കാരുടെ എണ്ണം എന്നിവയ്ക്ക് ആനുപാതികമായി വാടകത്തുക വ്യത്യാസപ്പെടും.

ബോർഡുമായി കരാറിലേർപ്പെടുന്നവർക്ക് ലേലത്തുക അടയ്ക്കാൻ തവണകൾ അനുവദിക്കുമെങ്കിലും ജി.എസ്.ടി. തുക തുടക്കത്തിൽത്തന്നെ ഒടുക്കണം. ബോർഡിന്റെ ഭൂമിയിലേതിനുപുറമേ, വഴിപാടായി ഉടയ്ക്കുന്ന നാളികേരം ലേലം ചെയ്യുമ്പോൾ ജി.എസ്.ടി. ഒഴിവാക്കി.

ജി.എസ്.ടി. ബാധകമായ മറ്റിനങ്ങൾ

* സിനിമ, സീരിയൽ ഷൂട്ടിങ്ങുകൾ, ക്യാമറ, വീഡിയോ തുടങ്ങിയവയ്ക്ക് വാടക ഈടാക്കുമ്പോഴും പാർക്കിങ് ഒരുക്കാൻ സ്ഥലം ലേലത്തിൽ നൽകുമ്പോൾ കരാറുകാർക്കും നികുതി ബാധകം.

* മാസംതോറും പതിനായിരം രൂപയോ അതിൽക്കൂടുതലോ വാടകയുള്ള കടകൾക്ക്.

* ദിവസവും ആയിരമോ അതിലധികമോ രൂപയ്ക്ക് വാടക ഈടാക്കുന്ന മുറികൾ (താമസത്തിന്).

* ബലിത്തറ, പുള്ളുവൻപാട്ട് തുടങ്ങിയ കാര്യങ്ങൾക്ക് കുത്തകാവകാശം എടുക്കുന്നവർക്ക്.

* ദേവസ്വംബോർഡിന്റെ പ്രസിദ്ധീകരണങ്ങൾക്ക് (ഡയറി, കലണ്ടർ തുടങ്ങിയവ) ആചാരപരമായ എല്ലാ കാര്യങ്ങളുടെയും കുത്തകാവകാശം സംബന്ധിച്ച് അഡ്വാൻസ് റൂളിങ് ഫയൽചെയ്യാൻ ദേവസ്വം ബോർഡ് തീരുമാനിച്ചു. ദേവസ്വങ്ങളിലെ മാസംതോറുമുള്ള വരവ്, ചെലവ് കണക്കുകൾ തുടങ്ങിയവ പിറ്റേമാസം അഞ്ചിനകം ഉദ്യോഗസ്ഥർ നൽകണം. വീഴ്ചമൂലം പിഴ ഒടുക്കേണ്ടിവന്നാൽ ഉദ്യോഗസ്ഥരിൽനിന്ന് ഇടാക്കും.