തിരുവനന്തപുരം : കോവിഡ് സാഹചര്യത്തിൽ നാലു മാസത്തിലേറെയായി പരിമിതപ്പെടുത്തിയ ബാറുകളുടെ പ്രവർത്തനസമയം പഴയപടിയാക്കുന്നു. രാത്രി 11 വരെ ബാറുകൾ പ്രവർത്തിപ്പിക്കാൻ അനുവദിക്കണമെന്ന ബാറുടമകളുടെ ആവശ്യം സർക്കാർ അംഗീകരിച്ചു. ഉത്തരവ് ഉടനുണ്ടാകും. രണ്ടാം കോവിഡ് ലോക്ഡൗണിന് ശേഷം തുറന്നപ്പോൾ രാത്രി 9 വരെ മാത്രമാണ് പ്രവർത്തനം. ഏറ്റവുമധികം വരുമാനം ലഭിക്കേണ്ട സമയത്ത് അടച്ചിടുന്നതുമൂലമുള്ള നഷ്ടത്തെക്കുറിച്ച് ബാറുടമകൾ എക്സൈസ് വകുപ്പിനോട് പരാതിപ്പെട്ടിരുന്നു.

കോവിഡ് മൂലം ബാർ മേഖലയിലുണ്ടായ വരുമാന നഷ്ടം കണക്കിലെടുത്ത് പുതിയ ബാറുകൾക്ക് നിയന്ത്രണം വേണമെന്ന ബാറുടമകളുടെ ആവശ്യം പുതിയ മദ്യനയത്തിൽ സർക്കാർ ഭാഗികമായി അംഗീകരിച്ചേക്കും. ഭാവിയിൽ പഞ്ചനക്ഷത്ര ഹോട്ടലുകൾക്ക് മാത്രം ബാർ ലൈസൻസ് നൽകണമെന്നും 50 മുറികളെങ്കിലുമുള്ള ഹോട്ടലുകൾക്ക് മാത്രമേ ലൈസൻസ് നൽകാവൂ എന്നുമായിരുന്നു മദ്യനയ രൂപീകരണത്തിന് മുന്നോടിയായി ബാറുടമകൾ ഉന്നയിച്ച ആവശ്യം. അനിയന്ത്രിതമായി ലൈസൻസുകൾ നൽകുന്നത് ബാർ വ്യവസായ മേഖലയെ തകർക്കുമെന്നും സേവനത്തിന്റെ ഗുണനിലവാരം കുറയുമെന്നുമാണ് ഇവർ ചൂണ്ടിക്കാട്ടിയത്. കഴിഞ്ഞ വർഷം ബിസിനസിൽ 40 % കുറവുണ്ടായതും അറിയിച്ചു.

എന്നാൽ ടൂറിസം മേഖലയ്ക്ക് തിരിച്ചടിയാകുമെന്നതിനാൽ ഒറ്റയടിക്ക് പുതിയ ത്രീ, ഫോർ സ്റ്റാർ ഹോട്ടലുകളെ തടയാൻ സർക്കാർ ഇഷ്ടപ്പെടുന്നില്ല. പകരം പുതിയ ബാർ ലൈസൻസ് ലഭിക്കണമെങ്കിൽ ത്രീ സ്റ്റാർ ഹോട്ടലിന് കുറഞ്ഞത് 30 മുറികളും ഫോർ സ്റ്റാർ ഹോട്ടലിന് 40 മുറികളും ഫൈവ് സ്റ്റാർ ഹോട്ടലിന് 50 മുറികളും എന്ന നിബന്ധന ഏർപ്പെടുത്താനാണ് ഉദ്ദേശിക്കുന്നത്. 2023 മുതൽ ലൈസൻസ് അനുവദിക്കുന്നവയ്ക്ക് ഇവ ബാധകമാക്കും. നിലവിൽ 10 മുറി ഉണ്ടെങ്കിൽ ബാർ ലൈസൻസ് ലഭിക്കും. അതേസമയം, ബാർ ലൈസൻസ് ലക്ഷ്യമിട്ട് ഏകദേശം 270 ഹോട്ടലുകൾ സംസ്ഥാനത്ത് നിർമാണം തുടങ്ങിയിട്ടുണ്ട്. ഇവ നിലവിലെ കെട്ടിടനിർമാണ പ്ലാനിൽ മാറ്റം വരുത്തേണ്ടിവരും.

നിലവിൽ 670 ബാറുകളാണ് സംസ്ഥാനത്തുള്ളത്. ബീയർ–വൈൻ പാർലറുകളുടെ ടൂറിസം പ്രാധാന്യം കണക്കിലെടുത്ത് ഇവയുടെ മുറികളുടെ എണ്ണത്തിൽ കർശന നിബന്ധന വന്നേക്കില്ലെന്നാണ് സൂചന.