പേരാവൂർ: 40 വർഷത്തിലധികമായി സർക്കാർ ഏറ്റെടുത്ത പേരാവൂർ താലൂക്കാസ്പത്രി ഭൂമി സംരക്ഷിക്കാത്ത ബ്ലോക്ക് പഞ്ചായത്തിന്റെ അനാസ്ഥക്കെതിരെ കോൺഗ്രസ് മണ്ഡലം കമ്മിറ്റി പ്രതിഷേധ പ്രകടനവും ബ്ലോക്ക് കവാടത്തിനരികിൽ ധർണയും നടത്തി. ഡി.സി.സി പ്രസിഡന്റ് മാർട്ടിൻ ജോർജ് ഉദ്ഘാടനം ചെയ്തു.

ആസ്പത്രിക്ക് വേണ്ടി മുൻ മന്ത്രി കെ.കെ. ഷൈലജ നാട്ടുകാരെ പറ്റിക്കാനുള്ള തറക്കല്ലിടൽ മാത്രമാണ് നടത്തിയതെന്ന് മാർട്ടിൻ ജോർജ് ആരോപിച്ചു. പേരാവൂർ ആസ്പത്രിക്ക് കിഫ്ബി ഫണ്ടിൽ അനുവദിച്ചതെന്ന് പറയപ്പെടുന്ന 52 കോടി എവിടെയെന്നും നിർമാണം വൈകിയാൽ സമരപരമ്പരക്ക് തുടക്കമിടുമെന്നും അദ്ദേഹം പറഞ്ഞു. 

മണ്ഡലം പ്രസിഡന്റ് ജൂബിലി ചാക്കോ അധ്യക്ഷത വഹിച്ചു. ഡി.സി.സി. സെക്രട്ടറി ബൈജു വർഗീസ്, ബ്ലോക്ക് പ്രസിഡന്റ് സുരേഷ് ചാലാറത്ത്, യൂത്ത് ലീഗ് മണ്ഡലം പ്രസിഡന്റ് സിറാജ് പൂക്കോത്ത്, യൂത്ത് കോൺഗ്രസ് ജില്ല പ്രസിഡന്റ് സുധീപ് ജെയിംസ്, പൊയിൽ മുഹമ്മദ്, ബാബു ജോസ്, കെ. സുഭാഷ്, മാത്യു എടത്താഴെ, അരിപ്പയിൽ മജീദ്, അജിനാസ്, നൂറുദ്ദീൻ മുള്ളേരിക്കൽ, രാജു ജോസഫ്, വി.എം രഞ്ചുഷ തുടങ്ങിയവർ സംസാരിച്ചു.

താലൂക്ക് ആസ്പത്രിയുടെ വികസന പ്രവർത്തനങ്ങൾക്ക് വേണ്ടി അനുവദിച്ച 52 കോടി രൂപ എവിടെ, ബ്ലോക്ക് പഞ്ചായത്തിന് കീഴിലുള്ള ആസ്പത്രിയുടെ വികസനപ്രവർത്തനങ്ങൾക്കും ദൈനംദിന പ്രവർത്തനങ്ങൾക്കും തടസ്സം നിൽക്കുന്നതാര്, തറക്കല്ലിടൽ മാമാങ്കം നടത്തിയും ഉണ്ടായിരുന്ന കെട്ടിടം പൊളിച്ചുമാറ്റി ജനങ്ങളുടെ കണ്ണിൽ പൊടിയിടാൻ ബ്ലോക്ക് പഞ്ചായത്തിന് എത്രകാലം സാധിക്കും തുടങ്ങി നിരവധിയാരോപണങ്ങൾ ഉന്നയിച്ചായിരുന്നു സമരം.