തിരുനാവായ : വഴിയരികിലെ താൽക്കാലിക കടകളിൽനിന്നുള്ള ജ്യൂസ് കുടിച്ച ഇരുനൂറോളം പേർക്ക് ഭക്ഷ്യവിഷബാധയേറ്റു. വൈരങ്കോട് തീയ്യാട്ടുത്സവം കാണാനെത്തിയ മലപ്പുറം, പാലക്കാട് ജില്ലകളിൽ നിന്നുള്ളവർക്കാണ് തണ്ണിമത്തൻ ജ്യൂസിലൂടെ ഭക്ഷ്യവിഷബാധയേറ്റത്.  തിരുനാവായ പഞ്ചായത്തിൽ മാത്രം അൻപതോളം പേർ ചികിത്സയിലുണ്ട്. കഴിഞ്ഞ വെള്ളിയാഴ്ചയായിരുന്നു ഉത്സവം. ഇതോടനുബന്ധിച്ച് ഒട്ടേറെ താൽക്കാലിക കടകളും തുറന്നിരുന്നു. തണ്ണിമത്തൻ ജ്യൂസായിരുന്നു പ്രധാനമായും വിറ്റഴിച്ചിരുന്നത്. ഇത് കുടിച്ച ശേഷം പനി, ഛർദി, വയറിളക്കം മുതലായവ അനുഭവപ്പെട്ടവരാണ് വിവിധ ആശുപത്രികളിലെത്തിയത്.  

ആരോഗ്യവകുപ്പ് അധികൃതർ ഒരു കടയിൽ പരിശോധന നടത്തി താൽക്കാലിക നടപടി സ്വീകരിച്ചിട്ടുണ്ട്. കൂടുതൽ സ്ഥലങ്ങളിൽ പരിശോധന നടത്തിവരികയാണ്. ഭക്ഷ്യസുരക്ഷാ വകുപ്പും പരിശോധന നടത്തി കടകളിൽനിന്ന് സാംപിളുകൾ ശേഖരിച്ച് പരിശോധനയ്ക്ക് അയച്ചിട്ടുണ്ട്. ജ്യൂസുണ്ടാക്കാൻ ഉപയോഗിച്ച വെള്ളമോ തണുപ്പിക്കാൻ ഉപയോഗിച്ച ഐസോ ആയിരിക്കാം ഭക്ഷ്യവിഷബാധയ്ക്കു കാരണമെന്ന് തിരുനാവായ ആരോഗ്യകേന്ദ്രം സർശിച്ച ഡി.എം.ഒ ഡോ. ആർ.രേണുക പറഞ്ഞു.

വേനൽക്കാലമെത്തിയതോടെ ഭക്ഷ്യവിഷബാധയും ശുദ്ധജല ലഭ്യതക്കുറവും ജില്ലയുടെ ആരോഗ്യത്തെ വീണ്ടും ബാധിച്ചു തുടങ്ങി. തിരുനാവായ പഞ്ചായത്തിൽ ഛർദി, വയറിളക്കം തുടങ്ങിയ പകർച്ചവ്യാധികൾ പടർന്നു പിടിച്ചതും പുത്തനത്താണിയിൽ ഷിഗല്ല സംശയിക്കപ്പെടുന്നതും ഇതിനുദാഹരണമാണ്. ശുദ്ധജല ലഭ്യത കുറഞ്ഞുവരുന്ന സാഹചര്യത്തിൽ ജലജന്യരോഗങ്ങൾക്കെതിരെ കരുതൽ വേണമെന്ന് ജില്ലാ ആരോഗ്യവിഭാഗം നേരത്തേ തന്നെ മുന്നറിയിപ്പു നൽകിയിരുന്നു.