പേരാവൂർ : ടൗണിനു സമീപം കേന്ദ്ര സർക്കാരിന്റെ ഉടമസ്ഥതയിലുള്ള സ്ഥലത്ത് വീണ്ടും മാലിന്യം തള്ളുന്നു. ശുചിത്വ പഞ്ചായത്തെന്ന സാക്ഷാത്ക്കാരത്തിനായി പഞ്ചായത്ത് ഭരണസമിതിയും നാട്ടിലെ വിവിധ സംഘടനകളും കൈകോർത്ത് ശുചീകരണ പദ്ധതികൾ നടപ്പിലാക്കുന്നതിനിടെയാണ് ടൗൺ മധ്യത്തെ പൊതുയിടത്തിൽ ദിവസവും ചിലർ മാലിന്യം തള്ളുന്നത്.

പോസ്റ്റോഫീസിനായി കേന്ദ്ര സർക്കാർ വർഷങ്ങൾക്ക് മുൻപ് വാങ്ങി ഉപയോഗിക്കാതെയിട്ട സ്ഥലമാണ് ഇപ്പോൾ മാലിന്യ നിക്ഷേപ കേന്ദ്രമായി മാറിയത്. ഈ സ്ഥലത്തിന്റെ വിവിധയിടങ്ങളിൽ മാലിന്യം കുന്നുകൂടി കിടക്കുകയാണ്. ഇവിടെ മാലിന്യം നിക്ഷേപിക്കുന്നവരെ പിടികൂടാൻ നിരീക്ഷണ കാമറകൾ സ്ഥാപിക്കണമെന്ന ആവശ്യമുയർന്നിട്ടുണ്ട്.വ്യാപാര സ്ഥാപനങ്ങളിൽ നിന്ന് ദിവസവും പഞ്ചായത്തിലെ ശുചീകരണ വിഭാഗം മാലിന്യം ശേഖരിക്കുന്നുണ്ട്. എന്നിട്ടും പൊതുസ്ഥലത്ത് മാലിന്യം നിക്ഷേപിക്കുന്നത് അധികൃതരോടുള്ള അവഹേളനമാണ്. ഇതിനെതിരെ നിയമ നടപടി ഉണ്ടായാൽ മാത്രമേ ഇത്തരക്കാരെ നേർവഴിയിലാക്കാൻ സാധിക്കൂ. പേരാവൂർ പഞ്ചായത്ത് ഇക്കാര്യത്തിൽ സത്വര നടപടി സ്വീകരിക്കണമെന്ന് വിവിധ സംഘടനകൾ ആവശ്യപ്പെട്ടു.