തലശേരി : തച്ചോളി ഒതേനനും കതിരൂർ ഗുരുക്കളും പൊയ്‌ത്തിനിറങ്ങിയ പൊന്ന്യം ഏഴരക്കണ്ടത്തിൽ തിങ്കളാഴ്‌ച കളരിവിളക്ക്‌ തെളിയും. രാത്രി ഏഴിന്‌ സാഹിത്യകാരൻ ടി പത്മനാഭൻ ഉദ്‌ഘാടനം ചെയ്യും. കാരായി രാജൻ, സി.കെ. രമേശൻ എന്നിവർ മുഖ്യാതിഥികളാവും. രാത്രി ബാംബു സിംഫണിയും സ്വതന്ത്ര കളരി, ഗുരുകൃപ കളരി സംഘങ്ങളുടെ അഭ്യാസവും.

പൊന്ന്യത്തങ്കത്തിന്റെ രണ്ടാംനാളിൽ കതിരൂർ ഗുരുക്കൾ–തച്ചോളി ഒതേനൻ അനുസ്‌മരണം പാട്യം പഠനഗവേഷണ കേന്ദ്രം ഡയരക്ടർ പി. ഹരീന്ദ്രൻ ഉദ്‌ഘാടനം ചെയ്യും. പൂരക്കളി, വനിതാ തോൽപ്പാവക്കൂത്ത്‌ എന്നിവ അവതരിപ്പിക്കും. ബുധനാഴ്‌ച രാത്രി ഏഴിന്‌ ദേശീയ യോഗാ ചാമ്പ്യൻഷിപ്പിൽ സമ്മാനം നേടിയ സന്മയ.എസ്‌.നമ്പ്യാരെ സി.പി.എം ജില്ലാ സെക്രട്ടറി എം.വി. ജയരാജൻ ആദരിക്കും.

യോഗാ പ്രദർശനവും വനിതാ പൂരക്കളിയും 24ന്‌ രാത്രി ഏഴിന്‌ ആദരസമ്മേളനം കെ. മുരളീധരൻ എം.പി. ഉദ്‌ഘാടനം ചെയ്യും. രാത്രി കർണൻ ബാലെ.

25ന്‌ സാംസ്‌കാരിക സമ്മേളനം ഖാദിബോർഡ്‌ വൈസ്‌ ചെയർമാൻ പി. ജയരാജൻ ഉദ്‌ഘാടനം ചെയ്യും. രാവണേശ്വരം ഗോത്രപ്പെരുമയുടെ ഗോത്രകലാ അവതരണം.

26ന്‌ എരഞ്ഞോളി മൂസ അനുസ്‌മരണം മന്ത്രി പി.എ. മുഹമ്മദ്‌ റിയാസ്‌ ഉദ്‌ഘാടനം ചെയ്യും. മാപ്പിളപ്പാട്ട്‌, ദഫ്‌മുട്ട്‌, ഒപ്പന എന്നിവയുണ്ടാവും.

27ന്‌ സമാപനസമ്മേളനം സ്‌പീക്കർ എം.ബി. രാജേഷ്‌ ഉദ്‌ഘാടനംചെയ്യും. എ.എൻ. ഷംസീർ എം.എൽ.എ അധ്യക്ഷനാവും. ജഗജിത്ത്‌ അനുസ്‌മരണവും ജിതേഷ്‌ സുന്ദരം, ഡോ. ഭാവന എന്നിവരുടെ ഗസലും.

ദിവസവും വിവിധ കളരി സംഘങ്ങളുടെ കളരി അഭ്യാസ പ്രകടനമുണ്ടാവും. സാംസ്‌കാരിക വകുപ്പും ഫോക്‌ലോർ അക്കാദമിയും കതിരൂർ പഞ്ചായത്തിന്റെയും പാട്യം ഗോപാലൻ സ്‌മാരക വായനശാലയുടെയും സഹകരണത്തോടെയാണ്‌ പൊന്ന്യത്തങ്കം സംഘടിപ്പിക്കുന്നത്‌. കോവിഡ്‌ കാലത്തെ ഇടവേളക്ക്‌ ശേഷമാണ്‌ പൊന്ന്യത്തങ്കം പുനരാരംഭിക്കുന്നത്‌.