കണ്ണൂർ : വീടുകളിൽ സൗര വൈദ്യുതി നിലയം സ്ഥാപിക്കുന്നതിന്‌ കുറഞ്ഞ പലിശനിരക്കിൽ വായ്‌പ. എസ്‌.ബി.ഐ, എച്ച്‌.ഡി.എഫ്‌.സി തുടങ്ങിയ ബാങ്കുകളാണ്‌ 6.7 ശതമാനം പലിശനിരക്കിൽ വായ്‌പ അനുവദിക്കുക. അനർട്ട്‌ നടപ്പാക്കുന്ന ഗാർഹിക സൗരോർജ പ്ലാന്റുകൾ നിർമിക്കുന്നതിനാണ്‌ വായ്‌പയെന്ന്‌ ജില്ലാ എൻജിനിയർ കെ. മുഹമ്മദ്‌ റാഷിദും ടെക്‌നിക്കൽ അസിസ്‌റ്റന്റ്‌ ഇ.കെ. ചന്ദ്രനും വാർത്താസമ്മേളനത്തിൽ അറിയിച്ചു.

ജില്ലയിൽ മൂന്നുവർഷത്തിനുള്ളിൽ 110 വീടുകളിലും 60 സർക്കാർ സ്ഥാപനങ്ങളിലും അനർട്ട്‌ സൗരോർജ പ്ലാന്റ്‌ സ്ഥാപിച്ചിട്ടുണ്ട്‌. സൗരതേജസ്‌ പദ്ധതിയിൽ നിലവിൽ രജിസ്‌റ്റർചെയ്‌ത 220 വീടുകളിൽ പ്ലാന്റ്‌ സ്ഥാപിച്ച്‌ 725 കിലോവാട്ട്‌ വൈദ്യുതി ഉൽപ്പാദിപ്പിക്കും. ജൂണോടെ പുരപ്പുറ സൗര പ്ലാന്റുകളിൽനിന്ന്‌ 2000 കിലോവാട്ട്‌ വൈദ്യുതി ഉൽപ്പാദിപ്പിക്കുകയാണ്‌ ലക്ഷ്യം. 650 വീടുകളെങ്കിലും രജിസ്‌റ്റർ ചെയ്‌താൽ മാത്രമേ ഇത്‌ സാധ്യമാകൂ.

ഗാർഹിക സൗരോർജ പ്ലാന്റുകളുടെ സ്പോട്ട് രജിസ്ട്രേഷനും ബോധവൽക്കരണവും 21, 22, 23 തീയതികളിൽ അനർട്ട് ജില്ലാ ഓഫീസിന് സമീപം അർബൻ സ്ക്വയർ ഹാളിൽ നടക്കും. രണ്ടുമുതൽ 10 കിലോവാട്ട്‌ വരെയുളള പ്ലാന്റുകൾക്ക് 20 മുതൽ 40 ശതമാനം വരെ സബ്സിഡി ലഭിക്കും. ഊർജമിത്ര കേന്ദ്രങ്ങളാണ്‌ രജിസ്ട്രേഷൻ നടത്തുന്നത്‌. ഊർജമിത്ര കല്യാശേരി 21ന്‌ കണ്ണപുരം പഞ്ചായത്തിലും 22ന്‌ മാടായിയിലും 23ന്‌ കടന്നപ്പള്ളി–പാണപ്പുഴ പഞ്ചായത്തിലും രജിസ്‌ട്രേഷൻ നടത്തും. ഊർജമിത്ര അഴീക്കോട് 21നും 22നും അഴീക്കോട് സർവീസ് സെന്ററിലും 23ന്‌ നാറാത്ത് പഞ്ചായത്തിലും ഊർജമിത്ര പയ്യന്നൂർ 21, 22, 23 തീയതികളിൽ സർവീസ് സെന്ററിലും ഊർജമിത്ര മട്ടന്നൂർ 23ന്‌ ഇരിട്ടി താലൂക്ക് ഓഫീസിന് സമീപത്തും സ്പോട്ട് രജിസ്ട്രേഷൻ നടത്തും. രജിസ്‌ട്രേഷന്‌ വൈദ്യുതി ബില്ല്, ആധാർ കാർഡ്, അഡ്വാൻസ് തുക 1180 രൂപ എന്നിവ കരുതണം.

കാർഷികമേഖലയിൽ സൗരോർജ വൈദ്യുതി പ്രോത്സാഹിപ്പിക്കുന്നതിനായി വിവിധ പദ്ധതികൾക്ക് 60 ശതമാനം സബ്സിഡിയുണ്ട്‌. നിലവിൽ കാർഷിക കണക്‌ഷനുള്ള പമ്പുകൾക്ക് ശേഷി അനുസരിച്ച് ഗ്രിഡ് ബന്ധിത സൗരോർജ പ്ലാന്റുകൾ സബ്സിഡിയിൽ സ്ഥാപിക്കാം. ഫോൺ: അനർട്ട് ജില്ലാ ഓഫീസ് -0497-2700051, 9188119413 ഊർജമിത്ര കേന്ദ്രങ്ങൾ: കല്യാശേരി – 7025981361, അഴീക്കോട് – 9604385661, മട്ടന്നൂർ – 9188592492, പയ്യന്നൂർ – 6238502900.