പേരാവൂർ: താലൂക്കാസ്പത്രിയിലെ ഐ.പി വിഭാഗം കെട്ടിടത്തിൽ ലിഫ്റ്റ്നിർമാണം പൂർത്തിയാക്കിയിട്ട് മാസങ്ങൾ കഴിഞ്ഞിട്ടും പ്രവർത്തിപ്പിക്കാൻ ബന്ധപ്പെട്ട അധികൃതർ അനുമതി നൽകുന്നില്ലെന്ന് പരാതി.ഇത് കാരണം രണ്ടും മൂന്നുംനിലയിലേക്ക് പോകുന്ന രോഗികൾ ദുരിതത്തിലായി.പേരാവൂർ പഞ്ചായത്തും പൊതുമരാമത്ത് വകുപ്പും (കെട്ടിടം വിഭാഗം) തമ്മിൽ നിലനിൽക്കുന്ന സാങ്കേതിക വിഷയങ്ങളാണ് ലിഫ്റ്റ് പ്രവർത്തിപ്പിക്കാൻ അനുമതി ലഭിക്കാത്തതിന് കാരണം .

ആരോഗ്യവകുപ്പിന്റെ 1 കോടി 40 ലക്ഷം രൂപയുടെഫണ്ടുപയോഗിച്ച് പൊതുമരാമത്ത് വകുപ്പാണ് കെട്ടിടം നിർമിച്ചത്.പുതിയ മൂന്ന് നില കെട്ടിടത്തിന്റെ നിർമാണത്തോടൊപ്പം ലിഫ്റ്റും നിർമിച്ചിരുന്നു.ലിഫ്റ്റ് പ്രവർത്തിപ്പിക്കണമെങ്കിൽ പൊതുമരാമത്ത് വകുപ്പ് ഇലക്ട്രിക്കൽ വിഭാഗത്തിന്റെ ഇൻസ്‌പെക്ഷൻ സർട്ടിഫിക്കറ്റ് ലഭിക്കണമെന്നാണ് പറയുന്നത്.എന്നാൽ,ഇതിനു മുൻപ് ബന്ധപ്പെട്ട തദ്ദേശ ഭരണ സ്ഥാപനത്തിൽ നിന്ന് എൻ.ഒ.സി ലഭിക്കണമെന്നും പറയപ്പെടുന്നു.

അധികൃതർ തമ്മിൽ നിലനിൽക്കുന്ന സാങ്കേതികതയിൽ കുരുങ്ങി അനുമതി വൈകുന്നതോടെ മൂന്നാം നിലയിലെ പുരുഷൻമാരുടെ വാർഡിൽ രോഗികളെ കൊണ്ട് പോകൽ ദുരിതമാവുകയാണ്.ലിഫ്റ്റ് പ്രവർത്തിപ്പിക്കാത്തതിനാൽ ആസ്പത്രിയിലെ വാർഡുകളിലേക്ക് പോയി വരുന്നതിന് രോഗികൾക്കും ജോലിക്കാർക്കും ബുദ്ധിമുട്ട് വർധിച്ചിട്ടുണ്ട്.അവശരായ രോഗികൾക്ക് രണ്ടാം നിലയിലും മൂന്നാം നിലയിലുമുള്ള കിടക്കയിലേക്ക് എത്തണമെങ്കിൽ പടികൾ ചവിട്ടി കയറിപോകേണ്ട അവസ്ഥയാണ്.ഇതിന് പരിഹാരം കാണാൻ ആസ്പത്രി മാനേജ്‌മെന്റ് കമ്മിറ്റിയും നടപടിയെടുക്കുന്നില്ല.ലിഫ്റ്റ് പ്രവർത്തിപ്പിക്കാൻ അധികൃതർ സത്വര നടപടി സ്വീകരിക്കണമെന്ന് ആസ്പത്രി സംരക്ഷണ സമിതി ആവശ്യപ്പെട്ടു.