പാലാ : വിവാഹിതനാണെന്ന വിവരം മറച്ചുവച്ച് വീണ്ടും വിവാഹം കഴിക്കുകയും 20 ലക്ഷം രൂപ തട്ടിയെടുക്കുകയും ചെയ്ത കേസിൽ പോണാട് കരിങ്ങാട്ട് രാജേഷിനെ (49) പൊലീസ് അറസ്റ്റ് ചെയ്തു.

വിദേശത്ത് ജോലി വാഗ്ദാനം ചെയ്ത് ഒട്ടേറെ പേരെ വഞ്ചിച്ചതിന് രാജേഷിനെതിരെ കാസർകോട്, കണ്ണൂർ, എറണാകുളം, ഇടുക്കി, കോട്ടയം ജില്ലകളിലായി 2007 മുതൽ കേസുകളുണ്ട്. കണ്ണൂർ സ്വദേശിയായ രാജേഷ് 2007ൽ കണ്ണൂർ, കാസർകോട് ജില്ലകളിൽ തട്ടിപ്പ് നടത്തി ഭാര്യയുമായി അവിടെ നിന്ന് എറണാകുളത്തേക്ക് താമസം മാറ്റുകയായിരുന്നു. 

അവിടെയും കേസുകളിൽ പെട്ടതോടെ 2012ൽ പാലായിൽ താമസം ആരംഭിച്ചു. കരൂരിൽ ചിട്ടി കമ്പനി നടത്തിയിരുന്ന രാജേഷിന്റെ സ്ഥാപനത്തിൽ ഭർത്താവ് മരിച്ച പൈക സ്വദേശിനിയായ യുവതി 2020 ജൂലൈയിൽ ജോലിക്കായി പ്രവേശിച്ചു. മാതാപിതാക്കൾ മരിച്ചുപോയതാണെന്നും വിവാഹമോചിതനാണെന്നും യുവതിയെ ധരിപ്പിച്ച് അടുപ്പത്തിലായ പ്രതി 2 കുട്ടികളുടെ അമ്മയായ യുവതിയെ 2021 ഓഗസ്റ്റ് 17ന് മാതാപിതാക്കളുടെ അനുവാദത്തോടെ റജിസ്റ്റർ വിവാഹം ചെയ്തു. 

പിന്നീട് യുവതിയോടും 2 കുട്ടികളോടുമൊപ്പം കുറ്റില്ലത്തെ വാടകവീട്ടിൽ താമസം ആരംഭിച്ചു. യുവതിയുടെ സഹോദരന് ഓഹരി നൽകുന്നതിനായി രാജേഷിന്റെ നിർദേശപ്രകാരം യുവതിയുടെ അമ്മയുടെ പേരിലുള്ള സ്ഥലം പണയപ്പെടുത്താൻ തീരുമാനിച്ചു. തുടർന്ന് അമ്മയുമായി കെ.എസ്.എഫ്. എലിക്കുളം ബ്രാഞ്ചിലെത്തിയ രാജേഷ് കെഎസ്എഫ്ഇയിൽ ഉണ്ടായിരുന്ന ചിട്ടിയുടെ ജാമ്യക്കടലാസിൽ അമ്മയെക്കൊണ്ട് ഒപ്പിടുവിച്ച് 20 ലക്ഷം രൂപ സ്വന്തം അക്കൗണ്ടിലേക്കു മാറ്റിയെടുത്തു.

 പിന്നീട് ആദ്യഭാര്യയോടും 18 വയസ്സുള്ള മകളോടുമൊപ്പം പാലായിൽ വാടകവീട്ടിലേക്ക് താമസം മാറ്റി.  വഞ്ചിക്കപ്പെട്ടതറിഞ്ഞ യുവതി ജില്ലാ പൊലീസ് മേധാവി ഡി.ശിൽപയ്ക്ക് പരാതി നൽകി. കേസെടുത്ത കാര്യം അറിഞ്ഞ് ഒളിവിൽ പോയ രാജേഷിനെ കൂവപ്പള്ളിയിലുള്ള ഒളിസങ്കേതത്തിൽ നിന്നാണ് എസ്.എച്ച്.ഒ കെ.പി. ടോംസൺ, എസ്.ഐ. എം.ഡി.അഭിലാഷ്, എ.എസ്.ഐ.മാരായ എ.ടി.ഷാജി, ബിജു കെ.തോമസ്, സീനിയർ സിവിൽ പൊലീസ് ഓഫിസർ ഷെറിൻ സ്റ്റീഫൻ, സിവിൽ പൊലീസ് ഓഫിസർ സി.രഞ്ജിത്ത് എന്നിവർ ചേർന്ന് അറസ്റ്റ് ചെയ്തത്. കോടതിയിൽ ഹാജരാക്കി റിമാൻഡ് ചെയ്തു.

വിദേശജോലി വാഗ്ദാനം ചെയ്ത് ഒട്ടേറെ പേരിൽ നിന്ന് രാജേഷ് ലക്ഷങ്ങൾ വാങ്ങിയിട്ടുണ്ടെന്ന്  ടോംസൺ പറഞ്ഞു. 2017ൽ 45 ലക്ഷം രൂപ തട്ടിയെടുത്തതിന് പ്രതിക്കെതിരെ പാലാ, കുറവിലങ്ങാട് പൊലീസ് സ്റ്റേഷനുകളിൽ കേസുണ്ട്.