പേരാവൂർ: പേരാവൂർ താലൂക്കാസ്പത്രിയുടെ പുറമ്പോക്ക് ഭൂമി കയ്യേറി സ്വകാര്യ വ്യക്തി നിർമിച്ച കടകളും വീടും ജില്ലാ കലക്ടർ എസ്. ചന്ദ്രശേഖറുടെ ഉത്തരവിന്മേൽ അധികൃതരെത്തി പൊളിച്ചു മാറ്റി. ആസ്പത്രിക്ക് സമീപം താമസിച്ചിരുന്ന അരയാക്കൂൽ സക്കീന ജില്ലാ കലക്ടർക്ക് നല്കിയ റിവിഷൻ ഹരജി തള്ളിയാണ് 1957-ലെ കേരള ഭൂസംരക്ഷണ നിയമ പ്രകാരം അനധികൃത കയ്യേറ്റം റവന്യൂ അധികൃതർ ഒഴിപ്പിച്ചത്.

റി.സർവേ 41/1 -ൽ പെട്ട ആസ്പത്രി പുറമ്പോക്ക് ഭൂമിയിലെ രണ്ട് സെന്റ് സ്ഥലത്തെ കയ്യേറ്റമാണ് ഇരിട്ടി താലൂക്ക് തഹസിൽദാർ സി.വി. പ്രകാശിന്റെയും ഭൂരേഖാ തഹസിൽദാർ എസ്. ലേഖയുടെയും നേതൃത്വത്തിൽ തിങ്കളാഴ്ച രാവിലെയെത്തിയ റവന്യൂ അധികൃതർ പൊളിച്ചു നീക്കിയത്. രണ്ട് കടമുറികളും ഒരു വീടുമാണ് ഭാഗികമായി പൊളിച്ചുമാറ്റിയത്. പേരാവൂർ ഡി.വൈ.എസ്.പിയുടെ നേതൃത്വത്തിൽ പോലീസ് സംഘവും പേരാവൂർ അഗ്നിരക്ഷാ സേനയും സ്ഥലത്തുണ്ടായിരുന്നു. വ്യാഴാഴ്ചയോടെ കയ്യേറ്റം പൂർണമായും ഒഴിപ്പിച്ച് സ്ഥലത്ത് അതിരു കല്ലുകൾ സ്ഥാപിക്കുമെന്ന് റവന്യൂ അധികൃതർ പറഞ്ഞു.

ഇതിനു സമീപം തളയൻ കണ്ടി അഹമ്മദ്കുട്ടി കയ്യേറിയ ഭൂമിയിലും അതിരുകല്ലുകൾ സ്ഥാപിക്കും. മറ്റ് കയ്യേറ്റങ്ങൾ കോടതി വിധിയുടെ അടിസ്ഥനത്തിലാവും ഒഴിപ്പിക്കുക. കയ്യേറ്റങ്ങൾ സ്വമേധയാ പൊളിച്ചുമാറ്റാൻ ഉടമക്ക് 2021 ഫെബ്രുവരിയിൽ ഇരിട്ടി തഹസിൽദാർ നോട്ടീസ് നല്കിയെങ്കിലും സബ് കളക്ടർക്ക് അപ്പീൽ നൽകുകയും 2021 ആഗസ്തിൽ അപ്പീൽ ഹരജി തള്ളുകയും ചെയ്തു. ഇതിനെതിരെ 2021 സെപ്തംബറിൽ ജില്ലാ കലക്ടർക്ക് നല്കിയ റിവിഷൻ ഹർജി ശനിയാഴ്ച തള്ളിയതോടെയാണ് കെട്ടിടങ്ങൾ പൊളിച്ചു മാറ്റാൻ റവന്യൂ അധികൃതർ നടപടി സ്വീകരിച്ചത്.

അരയാക്കൂൽ സക്കീന കഴിഞ്ഞ മാസം മരണപ്പെട്ടിരുന്നു. ഇവരുടെ ആശ്രിതർക്ക് ശനിയാഴ്ച നോട്ടീസ് നല്കിയാണ് നിയമനടപടികൾ പൂർത്തീകരിച്ചത്. ഡെപ്യൂട്ടി തഹസിൽദാർമാരായ എം.സി. സീനത്ത്, കെ. ഷീന, പേരാവൂർ വില്ലേജ് ഓഫീസർ അഭിനേഷ്, താലൂക്ക് സർവേയർമാരായ രവീന്ദ്രൻ കണ്ണോത്ത്, ഷിജിൽ, താലൂക്ക് ഓഫീസ് ജീവനക്കാരായ കെ. രാജേഷ്, എൻ. സുജീഷ്, പി. ലനീഷ്, ടി.പി. മണി, ഇ. ദീപേഷ് എന്നിവരും ഒഴിപ്പിക്കൽ നടപടികൾക്ക് നേതൃത്വം നല്കി.